د کندهار والي اسدالله خالد نن سهار (فبروري ٢٤) د ميوند ولسوالۍ ته د قومي مشرانو او ددغې ولسوالۍ د اوسېدونکو سره د يوې ناستې په موخه تللى و، چې بېرته د راستنېدو پرمهال له دې ډول پېښې سره مخامخ شو .

د کندهار والي اسدالله خالد له پېښې څه شيبه وروسته بي بي سي ته وويل دغه چاودنه د سړک له غاړې د يوه خښ کړاى شوي ماين په له کبله رامنځته شوه، چې پر وينا يې درې امنيتي پوليس وژل شوي او دوه نور ټپيان شوي دي .

د نوموړي پرونيا په دغه پېښه کې د پوليسو يو گاډى هم له منځه تللى، خو نورو کسانو ته پکې مرگ ژوبله نه ده اوښتې .

ښاغلى خالد وايي دا څرگنده نه ده چې ددغې چاودنې موخه دى و او که څنگه .

نوموړى څه موده وړاندې هم د کندهار په شاولي کوټ ولسوالۍ کې له دې ډول بريد څخه روغ رمت راووت .

په کندهار کې پر له پسې درېيو ځانمرګيو بريدونو او نننۍ چاودنې د دغه ولايت او سېدونکي سخت وېرولي چې له امله يې په بازارونو، لارو او کوڅو کې د پخوا په پرتله د خلکو ګڼه ګوڼه کمه شوې ده.