چارواکي وايي په دې چاودنه کې شاوخوا ١٠٠ کسان وژل شوي او ټپيان شوي دي .

د کندهار والي اسدالله خالد په يوه خبري غونډه کې وويل د وروستيو څېړنو له مخې د يکشنبې په ځانمرگي بريد کې د مريو شمېره تر ١٠٠ واوښته .

دغه ځانمرګى بريد د کندهار ښار د 'باغ پول' په سيمه کې د سپيو جنګولو په يوه مېله کې رامنځته شو .

په سيمه کې عيني شاهدان وايي چاودنه هغه وخت وشوه، چې په لس گونو کسانو د سپو د جنگولو مېلې تماشا کوله .

د چارواکو پروينا، د پېښې ځاى ته گڼ شمېر پوليس لېږل شوي، چې ټپيان د پېښې له ځايه روغتون ته نقل کړي .

په کندهارکې د بي بې سي خبريال د پېښې ځاى ته نژدې يوه روغتون ته ورغلى او وايي چې په دغه روغتون کې نژدې پنځوسو ټپيانو جسدونه ليدل کيږي .

د باغ پول په سيمه کې د سپيو جنگولو مېلې پر ځاى اوس د کابو ١٠٠ کسانو مړي پراته دي .

د افغانستان په کندهار ولايت کې د يکشنبې ورځې (دسلواغې ٢٨) ځانمرگي بريد، چې تر ١٠٠ زيات خلک پکې ووژل شول، د نړيوالو لخوا وغندل شو .

	پر بې دفاع خلکو دا رنګه کړنې په هېڅ دليل توجيه کېدای نشي .

د فرانسې ولسمشر او د برتانيې د بهرنيوچارو وزير دغه بريد سخت غندي او د ملگرو ملتونو عمومي منشي هم دغه بريد يوه تراژيدي بولي .

د طالبان د رژيم له ړنگېدو وروسته په افغانستان کې د کندهارښار ته نژدې دغه ترټولو هغو ستر خونړى بريد و .

په دغه بريد کې تر ١٠٠ زيات کسان ووژل شول او په لس گونو نور ټپيان شول .
بريد هغه وخت وشو کله چې په لس گونو کسان د کندهار په کوکران (باغ پول) سيمه کې د سپو جنگولو ولسي مېلې تماشا کوله .

له بريد وروسته د کندهار والي په يوه خبري ناسته کې ددغه بريد پړه د وسله والو طالبانو پر غاړه واچوله، خو طالبانو يې مسووليت په غاړه نه دى اخيستى .

د فرانسې ولسمشر نيکولا سرکوزي وويل په کندهار کې دغه ځانمرگى بريدهېڅکله زموږ له خپلو ارادو نه نشي اړولى، دده پر وينا، فرانسه او نړيواله ټولنه به د افغانستان له دولت سره د سولې او ټيکاو په راوستلو کې هېڅ ډول مرسته ونه سپموي .

يوه ډارنه او بده ترهگريزه کړنه  دغه بريد چې د کندهار د خلکو او افغانستان ملت پر ضد وشو يوه ډارنه او ډېره بده ترهگريز کړنه وه . زه له دې کبله خپله ډاډګېرنه او خواخوږي د افغانستان دولت او خلکو ته وړاندې کوم ډېوېډ مليبنډ

د ملگرو ملتونو عمومي منشي بان کي مون هم په يوه خبرپاڼه کې ويلي چې پر بې دفاع خلکو دا رنګه کړنې په هېڅ دليل توجيه کېدای نشي .

په دغه خبرپاڼه کې راغلي چې:'' د کندهار دغه ځانمرگى بريد په افغانستان کې د ناامنۍ د تراژېدۍ يوځل بيا په زړۀ کول دي . د افغانستان دولت هڅه کوي په دغه هېواد کې له ډېروکلونو جگړې وروسته د بيارغاونې چارې ترسره کړي .''

په دې وروستيو کې د کندهار ولايت په گډون د افغانستان سويلي سيمې د ناامنيو او تاوتريخوالي شاهدې دي .

تېره اوونۍ هم د کندهار په شاولي کوټ ولسوالۍ کې ددغه ولايت والي له يو وسله وال بريد جوړ راووت، چې پکې يو کس ووژل شو او يو بل ټپي شو .

ددغه بريد پړه لا تراوسه چا پرغاړه نه ده اخيستې .

د افغانستان په سويل کې کندهار يو له هغو ناامنه ولايتونو څخه دى چې هر وخت پکې بمي چاودنې او ځانمرگي بريدونه کيږي .

تېره اوونۍ د کندهار والي په شاه ولي کوټ ولسوالۍ کې له يوه بمي بريد روغ راووت خو يو کس پکې ووژل شو او يو بل ټپي شو.