دسويلي خوست ولايت کې د سړک دغاړې بمي چاودنه هغه مهال رامنځته شوه چې افغان او نړيوالو ځواکونو په سيمه کې د تېرېدو پرحال کې وو .

سيمه ييز چارواکي وايي دغه بريد د 'لکن خېلو' په سيمه کې هغه وخت وشو چې د افغان سرتېرو يو کاروان په سيمه کې د تېرېدو په حال کې وو.

د خوست ولايت پوليس وايي دغو افغان سرتېرو له نړيوالو ځواکونو سره د امنيت په نيولوکې ملگرتيا کوله .

خوست يو له هغه ناامنه ولايتونو څخه دى چې شاوخوا ٢٠ ورځې وړاندې هم يو ځانمرگى بريد پکې شوى و.

بل خوا په لوېديځ ولايت فراه کې پوليس وايي يوشمېر د باښو ښکاريان چې د وسله والو طالبانو لخوا نيول شوي وو بېرته خوشي شوي دي .

چارواکي وايي له دغو ښکاريانو څخه ٢٠ کسان عربان هم ول .

د فراه ولايت د پوليسو يوۀ چارواکي عبدالرشيد بي بي سي ته وويل ددغو ښکاريانو له ډلې څخه څلور کسان اوس هم د طالبانو په لاس کې دي .

د ځايي پوليسو پر وينا، دغه ښکاريان چې په يوه غرنيزه سيمه کې يې د باښو ښکار کاوه، د طالبانو د يوۀ ځايي قومندان ملاخداداد لخوا ونيول شول .

دده پر وينا، زيات شمېر ښکاريان خوشي کړاى شوي او د څلورو نورو د خوشي کېدو هڅې لادوام لري .

بل خوا په دغه ولايت کې پوليس وايي چې يوۀ ځانمرگي بريدکوونکي دلارام ولسوالۍ ته نژدې د 'لخشک' په سيمه کې يوه امنيتي کاروان ته څېرمه خپل گاډى وچووۀ.

د راپورونو له مخې ځانمرگى وژل شوى او يو کس ټپي شوى دى .