غزل اکمل له کابله

	دا په داسې حال کې ده چې ٤ ورځې وړاندې د افغانستان د روغتيا وزير د روغتيا په برخه کې بيړنى حالت اعلان کړ

د هرات د غوريان ولسوالۍ سرپرست عرب شاه اماني بي بي سي ته وويل 45 تنو د واورې دډير ورښت او راښويدو له کبله ژوند له لاسه ورکړ .

د ښاغلي اماني په وينا د مړو ترمنځ ډير کسان د څارويو ساتونکي او مساپر دي چې د افغانستان او ايران پولې ته يې څيرمه سيمو کې تگ راتگ کاو .

دده په وينا له يو متر ډيره واوره ا وريدلې ده او د غوريان ولسوالۍ دډيرو کليو هغه لارې يې تړلي دي چې مرکز غځيدلي.

ښاغلى اماني ادعا کوي چې د لارو دپرانيستې لپاره تر اوسه هيڅ ډول گامونه نه دي اخيستل شوي .

د هرات ولايت د کليو د پراختيا رياست مشر او د طبيعي پيښو په وړاندې د بيړنيو حالاتو د کميټې چارواکى محمد صديق په داسې حال کې چې له دغو زيانونو څخه خپله ناخبري ښيي وايي ډير ژر به يو پلاوى دغې ولسوالۍ ته د څيړنې لپاره وليږي .

په همدې ترڅ کې د غور د ولايتي شورا مشر عبدالغفور تيمن بي بي سي ته وويل ددغه ولايت په ډيرو سيمو کې له غرونو څخه د وارو د ښويدو له کبله ١٣ کسان مړه او ١٢ نور ټپيان شوي دي :
((دپرون شپې راهيسې له بيلابيلو سيمو څخه هغه راپورنه چې د ټيليفون او مخابرې له لارې موږ ته رسيدلي وايي ٤٢ کسه مړه او ٣ نور هم نن مړه شوي دي چې ټول ټال ٤٥ تنه مړه شوي دي . دا پيښه پولې ته نژدې د غوريانو په ولسوالۍ کې رامنځته شوې ده.))

د هغه په وينا په وژل شويو کې دوه ماشومان هم شامل دي او ددغه ولايت د ځينو ولسواليو لارې هم مرکز ته بندې شوي دي او خلک له لوږې سره مخامخ دي :

((بايد له خپلو خلکو سره مرسته وکړئ ، ددغه ځاى خلک له لوږې سره مخامخ دي په هر کلي کې پنځه شپږ کورنۍ د خوړلو لپاره ډوډۍ نلري . ))

	چارواکي وايي په غور کې له غرۀ د واورې ښوويدو لږ تر لږه ١٣ کسان وژلي دي

همدرانگه د غزني ، ميدان وردگو ، باميان ، بدخشان ، کونړ او دايکندي ولايتونو څخه هم رپوټونه وايي چې ددغو ولايتونو د ډيرو ولسواليو لارې هم د ډيرې واروې له کبله له مرکز سره تړل شوي دي او ډيرى خلک يې له ستونزو سره مخامخ کړي دي .

د ميدان وردگو د والي وياند عبداله الهام بي بي سي ته وويل که چيرې اړوند اړوند چارواکي ددغو سيمو د لارو د خلاصيدو لپاره پاملرنه ونکړي نو په روغتيايي مرکزونو کې به دارو درمل ختم شي او خلک به له روغيتايي خدمتونو بې برخې پاتې شي :

دا په داسې حال کې ده چې ٤ ورځې وړاندې د افغانستان د روغتيا وزير د روغتيا په برخه کې بيړنى حالت اعلان کړ او وېويل چې د هوا له لارې به زيانمن شوو ليرې پرتو سيمو ته دارو درمل ورسوي .

همدارراز د دايکندي ولايت د والي ددفتر مشر غلام سرور حيدري هم بي بي سي ته وويل چې په دغه ولايت کې هم له يو متر ډيره واوره اوريدلې او د لارو د بنديدو له کبله د خوراکي توکو بيې هم لوړې شوي دي

د هغه په وينا ددايکندي ولايت په بازارونو کې خوراکې توکي مخ په خلاصيدو دي .