چپرهار د ننگرهار يو له نارامو ولسواليو څخه ده

په ختيځ کې د ناټو ځواکونو استازي وايي يوۀ سړي په چپرهار ولسوالۍ کې د دوى پر گاډو ځانمرگى بريد وکړ، چې لامله يې د دوى يو گاډي اور واخيست، يو سرتېرى يې ټپي شو او يو عادي سړى ووژل شو.

خو په کابل کې د کورنيو چارو وزارت وايي دوى په بريد کې يوازې د بهرنيو ځواکونو د يوۀ گاډي په ويجاړېدلو خبر دي. بهرنيو سرتېرو او يا ولسي خلکو د مرگ ژوبلې په اړه د کورنيو چارو وزارت ناخبري ښيي.

خو د طالبانو يوۀ وياند بي بي سي ته وويل چې په بريد کې د بهرنيو ځواکونو دوه گاډي وران شوي دي او پکې سپارۀ ټول سرتېري وژل شوي دي.

پر بهرنيو ځواکونو باندې په روان کال کې بريدونه زيات شوي دي، چې په افغانستان کې يې د دوى د مرگ ژوبلې شمېره تر بل هر کال لوړه کړې ده.