الياس وحدت له خوسته

	په وروستيو کې پر افغان پوځيانو او پوليسو بريدونه زيات شوي دي

سيمه ييز چارواکي وايي يوۀ سړي چې د افغان ملي پوځ جامې يې پر تن وي د برمل ولسوالۍ په مرکز کې د يوې گډې افغان او ناټو پوځيانو د اډې له مخې ځان والوزاوۀ.

بريد د گډې اډې په دروازه کې نن سهار شوى، چې د دفاع وزارت له خبرپاڼې سره سم، درې افغان سرتېري پکې وژل شوي او درې نور ټپيان شوي دي.

خو نړيوال ځواکونه چې وايي په بريد کې دوى ته مرگ ژوبله نه ده اوښتي د وژل شويو افغان پوځيانو شمېره څلور تنه ښيي.

د پوليسو يوۀ چارواکي بيا د يوۀ ولسي سړي د وژل کېدلو او دريو نورو ټپي کېدلو خبره هم وکړه.

د دفاع وزارت همدارنگه په يوه بله خبرپاڼه کې وايي چې په زابل کې يې څلور پوځيان د سړک د غاړې د بم په چاودنه کې ټپيان شوي دي. د دوى روغتيايي حالت ښه ښوول شوى دى.