احمد الهام له کندزه

	د طالبانو د ادعا خلاف، په کندز کې د ناټو ځواکونو يوۀ وياند وويل چې دوى نه د بريد نښه و او نه مرگ ژوبله ور اوښتي ده

د کندز د پوليسو مشر ايوب سالنگي وايي يو گاډى چې له چاودېدونکو توکو څخه ډک شوى و د شنبې پر سهار د باغ بي بي په سيمه کې وچاودېد چې د بريد کوونکي سربېره يو ولسي سړى هم ووژل شو.

وژل شوى سړى اتيا کلن بوډا ښوول شوى. په دوو ټپيانو کې يو د سيمه ييزو استخباراتو مامور دى.

چارواکي وايي نه پوهېږي چې د بريد موخه به څوک و، خو وايي چې له چاودېدونکو توکو ډک گاډى د دوى تر څارنې لاندې و.

د طالبانو يوۀ وياند ذبيح الله مجاهد بي بي سي ته وويل بريد دوى کړى او د ناټو ځواکونو دوه گاډي يې له منځه وړي او څو سرتېري يې ور وژلي دي.

خو په کندز کې د ناټو ځواکونو يوۀ وياند وويل چې دوى نه د بريد نښه و او نه مرگ ژوبله ور اوښتي ده.

د افغانستان شمال په پرتليزه توگه د هېواد تر ټولو ارامه سيمه ده، خو خال خال د تاوتريخوالي پېښې پکې کېږي. همدلته تر ټولو خونړۍ پېښه په بغلان ولايت کې د تېرې اوونۍ چاودنه وه چې تر ١٥٠ زيات خلک يې ووژل او يا ټپيان کړل. په وژل شويو کې شپږ تنه د ولسي جرگې غړي هم شامل وو.