نعمت الله کرياب له اسد اباده

	ځايي چارواکي وايي بهرنيو ځواکونو ته دغه مرگ ژوبله د ماڼوگي ولسوالۍ په کوړنگل سيمه کې ور اوښتي

د ناټو ځواکونو يوه خبرپاڼه وايي دوى تېره ورځ د وسله والو يوه ډله وليده او بيا يې له ځمکې او هوا څخه پرې بريدونه پيل کړل.

وايي په نښته کې يې يو سرتېرى ووژل شو او دوه نور ټپيان شول. د قربانيانو هويت لا نه دى معلوم.

ځايي چارواکي وايي بهرنيو ځواکونو ته دغه مرگ ژوبله د ماڼوگي ولسوالۍ په کوړنگل سيمه کې ور اوښتي ده چې د چهارشنبې په ورځ هم جگړه او بمباري ښه په درز پکې روانه وه.

بهرنيو ځواکونو د روانې اوونۍ له پيله په کونړ کې پوځي عمليات پيل کړي دي، چې تر اوسه پکې د ځينو ولسي خلکو د وژل کېدو خبرونه هم ورکړل شوي دي.

کونړ په ختيځ افغانستان کې د حکومت مخالفو وسله والو يو پياوړى مرکز بلل کېږي، چې د طالبانو، حزب اسلامي او عربو سلفي ډلو په گډون پکې بېلابېل اړخونه د بهرنيو او افغان ځواکونو په ضد جگړه کوي.