د ناټو مشر وايي سپک بمونه به ولسي خلکو ته د زيان احتمال لږ کړي، خو دغه شونتيا په بشپړه توگه له منځه نه شي تللى

په برتانيې کې له خپريدونکې Financial Times ورځپاڼې سره په مرکه کې ښاغلي شيفر وويل د ټلوالي قوماندانان پر دې کارکوي چې په ځينې حالاتو کې د ناټو الوتکي واړۀ بمونه وکاروي.

که څه هم چې وايي شونې نه ده چې دغه بدلون دې په بشپړ ډول ملکي وگړو ته د مرگ ژوبلې د مخنيوي ژمنتيا وکړي.

دۀ وويل د سوله ساتو ځواکونو قوماندان خپلو سرتېرو ته همدا ډول ويلي چې که پر وسله والو طالبانو بريدونه ولسي خلکو ته د مرگ ژوبلې لامل کېږي، خپل بريدونه دې وځنډوي.

په روانه مياشت کې تر نوي ډيرو ناحکومتي موسسو وويل چې سږکال شاوخوا ٢٣٠ تنه ملکي وگړي دنړيوالو ځواکونو په پوځي عملياتو کې په افغانستان کې وژل شوي دي .

افغان ولسمشر خپلو خلکو ته د بهرنيو ځواکونو لخوا د زياتېدونکې مرگ ژوبلې لامله په وار-وار له ناخوښۍ ډکې ويناوې کړې. دۀ د ناټو ځواکونو ته گيله کړې ده چې دوى ته د افغانانو ژوند بې ارزښته ښکاري.