افغانستان او پاکستان خپلمنځي سوداګري زياتوي
- Author, عبدالله ستانکزی
- دنده, له کابله
افغانستان او پاکستان سلا شوي چې په راتلونکو پېنځو کلونو کې به گډه سوداگري تر پېنځو ميلياردو ډالرو پورې رسوي.
د اسلام اباد د سفر له بشپړولو وروسته په کابل کې د ولسمشر کرزي دفتر وايي دواړو هېوادونو د اقتصادي او سوداګريزې همکارۍ د پراختيا په موخه نوي تړونونه لاسليک کړي دي .
د افغانستان د ولسمشرۍ دفتر وايي دغه تړونونه پاکستان ته د افغان ولسمشر حامد کرزي د دوه ورځني سفر پر مهال شوي دي.
دوی وايی کابل او اسلام اباد د ټرانزيټ په برخه کې د افغان سوداګرو د ستونزو د هوارولو او په افغانستان کې د پاکستاني پانګوالو لپاره د پانګونې د زمينې د برابرولو پر سر موافقې ته رسېدلي .
خو په دې اړه ډېر جزييات روښانه نه دي.
افغانستان او پاکستان موافقه کړې چې تر ۲۰۱۵ کال پورې به د اقتصادي پېاوړتيا په موخه د دواړو هېوادونو ترمنځ د سوداګرۍ کچه يو په دوه ډېروي.
اوسمهال د دواړو هېوادونو ترمنځ د سوداګرۍ کچه شاوخوا دوه ميليارده ډالره اټکل شوې ده.
حامد کرزي او اصف علي زرداري د ليدنو کتنو پر مهال د جلال اباد – پېښور او کندهار – کوېټې ترمنځ د رېل يا اورگاډي د پټلۍ پر جوړولو ټېنګار کړی دی.
د دواړو هېوادو مشران د پانګونې د يوه ګډ شرکت او د صنعتي پارکونو په جوړولو هم سلا شوي دي.
په کابل کې د ولسمشرۍ دفتر وايي پاکستاني ولسمشراصف علي زرداري او حامد کرزي يو ځل بيا د ترهگرۍ پر وړاندې پر جدي مبارزه ټينګار وکړ.
افغانستان او پاکستان دواړه له ترهگرۍ څخه کړېږي ، خو يو شمېر افغان چارواکي فکر کوي چې اورپکي له پاکستان څخه افغانستان ته ور اوړي ، مګر پاکستان تل دغه ادعاوې ردوي.
د کابل او اسلام اباد ترمنځ د تړونونو په لړ کې يو دا هم دى چې پاکستان به تر راتلونکو دوو کلونو پورې دوه زره افغان محصلينونو ته د لوړو زده کړو فرصت برابروي.
د کرنې او روغتيا سکټور هم له پامه نه دی غورځېدلی. پاکستان منلې چې افغان ناروغانو ته به د پاکستان په روغتونونو کې اسانتياوې برابروي او دغه راز به د کرنې افغان مامورين د پاکستان په څېړنيزو مرکزونو کې روزل کېږي.
