د پاکستان ملي امنيت مشاور له طالب چارواکو سره ليدلي
د عکس سرچینه، BALKHI
د پاکستان د ملي امنيت سلاکار معيد يوسف د دغه هېواد د بهرنيو چارو وزارت له يوه پلاوي سره (شنبې ۲۹ جنوري) کابل ته تللی او هلته يې د طالبانو د بهرنيو چارو چارسمبالي وزير امير متقي او د رئيس الوزرا له مرستیال عبدالسلام حنفي تر څنګ له ځينو طالب چارواکو سره کتلي دي.
د طالبانو د بهرنيو چارو وزارت د اقتصادي برخې مشر شفيع اعظم بي بي سي سره خبرو کې د دې سفر موخه د اقتصادي ودې او د ټرانزيټ مسلو حل وباله.
د نوموړي په وینا، "د پاکستان او افغانستان تر منځ د سوداګرۍ په اړه خبرې وشوې، په ځانګړې توګه د افغانستان پر مېوو ماليات معاف شول، د افغان توکيو د ټرانزيټ لپاره د کراچۍ او واګه بندر هم په اختيار کې ورکړل شول، د لاريو د حق العبور نه اخيستو، د منځنۍ اسيا او پاکستان تر منځ د مالونو د لېږد رالېږد او د تورخم او سپين بولدک دروازو د ۲۴ ساعته فعاليت په اړه خبرې وشوې". د ښاغلي اعظم په وينا د تخنيکي ډلو له کار وروسته به لاسليک شي.
د پاکستان ملي امنيت سلاکار داسې مهال افغانستان ته سفر کوي چې همدا دوې ورځې مخکې يې د خپل هېواد پارلمان بهرنيو چارو کمېټې ته وويل، د افغانستان خاوره لا هم د پاکستان پر ضد کارول کېږی.
خو ښاغلی اعظم زياتوي، طالبانو يو ځل ژمنه وکړه چې د افغانستان خاوره به د هېڅ ګاونډي پر ضد نه کارېږي.
د طالبانو د بهرنيو چارو وزارت وياند عبدالقهار بلخي هم پر ټوټېر د طالبانو د بهرنيو چارو چارسمبالي وزير امیر متقي او معيد يوسف تر منځ د ناستې خبر ورکړی او زياته کړې يې ده چې په دې ليدنه کې هوکړه وشوه چې د سوداګرۍ د لاښې ودې په موخه د دواړه غاړو ګډه کمېټه جوړه شي چې د تجارت په برخه کې راتلونکي خنډونه حل او سوداګرۍ ته وده ورکړل شي.
د عکس سرچینه، Mansoor ahmedkhan
په افغانستان کې د طالبانو حکومت سوداګریو او صنایعو سرپرست وزیر نورالدین عزیزي په کابل هوايي ډګر کې د ښاغلي یوسف هرکلي ته ورغلی و.
د افغانستان لپاره د پاکستان سفیر منصور احمد خان په یوه تازه ټویټر پیغام کې ویلي، د پاکستان ملي امنیت سلاکار د طالبانو د رئیس الوزرا له مرستیال عبدالسلام حنفي سره لیدلي او '' د پاکستان - افغانستان تر منځ یې د ورورګلوۍ اړیکو پیاوړي کولو لړ کې د سوداګرۍ، ټرانزیټ، او رابطو پر موضوعات خبرې وکړې. ''
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
کابل ته د پاکستان لومړي وزیر د ملي امنیت سلاکار معید یوسف سفر مخکې پلان شوی و، خو د روانې جنورۍ پر اتلسمه ناڅاپه وځنډول شو.
پاکستاني چارواکو هغه مهال د کابل موسم خرابتیا د دې سفر ځنډولو لامل بللی و.
د عکس سرچینه، Mansoor ahmed khan
د یادونې ده، چې له دې مخکې یو شمېر افغان فعالانو د ښاغلي یوسف د سفر پر ضد کابل کې د احتجاجي غونډې اعلان کړی و او پر خواله رسنیو یې توند غبرګونونه څرګند کړي وو.
مخکې پاکستان رسنیو د دغه هېواد د چارواکو له خولې خبر ورکړی و، چې د ښاغلی یوسف په مشرۍ یو پلاوی به د جنورۍ پر اتلسمه په دوه ورځني رسمي سفر کابل ته لاړ شي.
پاکستاني چارواکو ویلي و، له طالب چارواکو سره لیدنو کتنو کې به پام تر ډېره د افغانستان پر بشري وضعیت او په دې برخه کې د پاکستان پر همکارۍ ور ټول وي.
