تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د طالبانو پلاوي د 'سوداګرۍ او ټرانزیټ پر موضوعاتو' د ازبکستان له چارواکو سره خبرې کړې
د طالبانو وياند او د اطلاعاتو کلتور وزارت مرستيال ذبيح الله مجاهد رسنیو ته په استولي خبرپاڼه کې ويلي، چې د دوی د رئيس الوزرا د مرستيال مولوي عبدالسلام حنفي په مشرۍ پلاوی له ازبکستان څخه بېرته کابل ته ستون شوی دی.
د طالبانو حکومت یو پلاوی د سوداګرۍ او ټرانزیټ په ګډون د دوه اړخیزو مسایلو پر سر د خبرو لپاره ازبکستان ته تللی و.
د خبرپاڼې له مخې "پلاوي د ازبکستان له لوري سره د دوه اړخيزې سوداګرۍ په پراختيا، افغان سوداګرو لپاره په ټرانزيټ کې اسانتياو برابرولو، روغتيايي سکتور کې همکارۍ، د سرخان-پلخمري برېښنا مزي او د مزار شريف-کابل او پېښور تر منځ د رېل پټلۍ په اړه خبرې کړې دي".
ذبیح الله مجاهد وايي چې د دواړو هېوادونو پلاو د ازبکستان په ترمذ ښار کې د دغه هېواد د لومړي وزیر له مرستیال زاکوف سره هم کتلي دي.
له دې مخکې د اکتوبر لومړیو کې د ازبکستان بهرنیو چارو وزیر کابل ته تللی و او د طالبانو بهرنیو چارو له وزیر سره یې لیدلي و. د طالبانو بهرنیو چارو وزارت ویاند په یوه ټویټر پیغام کې هغه مهال د ازبکستان بهرنیو چارو وزیر له قوله ویل شوي و چې له افغانستان سره به یې د هېواد اړیکي د نورو مسایلو له اغېر پرته پر ګډو ګټو متمرکزې وي.
د ازبکستان بهرنیو چارو وزیر عبدالعزیز کاملوف ویلي، هېواد به یې له افغانستان سره د ټرانزیټي، سوداګریزو او انرژۍ برخه کې پر خپلو ژمنو ودریږي.
ازبکستان د افغانستان وارداتي برېښنا ۷۷ سلنه پوره کوي او پاتې نوره برخه له تاجکستان او ایران واردیږي.
تېره میاشت والسټریټ ژورنال خبري شبکې په خپل رپوټ کې وویل، که افغانستان د وارداتي برېښنا لړ کې ۹۰ میلیونه ډالره پور پرې نه کړي، چې تېرو څو میاشتو کې پرې پاتې دی، ښايي له برېښنا محروم شي.
وروسته د بلومبرګ په یوه رپوټ کې وویل شول چې د افغانستان (برېښنا) شرکت د ملګرو ملتونو له استازولۍ (یوناما) غوښتي چې د بشردوستانه مرستو په توګه د هېواد وارداتي برېښنا پور پرې کړي، خو یوناما مسوولینو وروسته وویل، له دوی داسې کومه غوښتنه نه ده شوې.
