تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
سویلي افریقا کې یوې ښځې ۱۰ ماشومان وزېږول
په سویلي افریقا کې یوې مېرمن ۱۰ ماشومان زېږولي چې کېدای شي نړیوال ریکارډ وبلل شي.
د ګوسیامي تهامارا ستولي مېړه وايي، د ماشومانو له زېږون وروسته ځکه حیران پاتې شول چې په سکین تصویرونو کې د مور نس کې اته ماشومان ښکاریدل.
د دې ښځې مېړه تیبوهو څوتاتسي د دوشنبې پر شپه پریتوریا نیوز سره خبرو کې وویل:
''اووه هلکان او درې نجونې دي، زه خوښ یم، احساساتي یم، ډېرې خبرې نه شم کولای. ''
د ۳۷ کلنې مېرمن ستولي مخکې هم دوه غبرګوني زېږېدلي چې اوس شپږ کلن دي.
ویل کېږي د دوشنبې پر ماښام د پریتوریا ښار روغتون کې دغه ماشومان د مېرمن ستولي د مېندوارۍ پر ۲۹ اوونۍ له جراحي عملیاتو وروسته زېږېدلي او ویل کېږي چې د هغې روغتیا ښه ده.
د سویلي افریقا ټولنیزې ودې ادارې ځايي څانګې بي بي سي ته د دې نویو ماشومانو زېږېدل تایید کړي دي.
بل لور ته د نړیوالو ریکارډونو ثبتونکي کتاب 'ګینیز بک اف ورلډ ریکارډز ' مسوولینو بي بي سي ته ویلي، د مېرمن سیتولي د لسو ماشومانو زېږون موضوع په هکله څېړنه کوي.
په یوه ځل له دې مخکې د امریکا یوې مېرمنې ۲۰۰۹ کال کې اته ماشومان وزېږول چې ټول ژوندي پاتې شول او همدا اوس یې نړیوال ریکارډ پر نامه ثبت دی.
تېره میاشت بیا مراکش کې د مالي یوې ۲۵ کلنې مېرمن حلیمه سیسې اته ماشومان وزېږول چې د رپوټونو له مخې تر اوسه د دې مور او ماشومانو روغتیايي وضعیت ښه دی.
په سویلي افریقا کې د روغتیايي چارو لپاره د بي بي سي خبریاله رهودا ودهیامبو وايي، معمولاً د داسې مېندو ماشومانو له وخته مخکې زېږي چې شمېر یې زیات وي.
داسې لږ مېندوارې ښځې شته چې له دریو زیات ماشومان یې په یو ځل د مېندوارۍ له مصنوعي درملنې پرته وزېږي، خو دغه جوړه وايي، مېندواري یې طبیعي وه.
