افغان سوله؛ ولسمشر غني د تاوتریخوالي کمولو لپاره د قطر همکاري وغوښته
د عکس سرچینه، ARG
د افغانستان ولسمشرۍ ماڼۍ وايي، افغان ولسمشر محمد اشرف غني د قطر امیر شیخ تمیم بن حمد الثاني سره پر افغان سوله خبرې وکړې.
د ارګ د خبرپاڼې له مخې، دې ټلیفوني خبرو کې ولسمشر غني افغانستان کې د تاوتریخوالي کمولو لپاره د قطر همکاري وغوښته:
"موږ هیله درلوده چې تاوتریخوالی کم شي، خو له بده مرغه زیات شوی، موږ دې برخه کې د قطر همکاري غواړو چې د سولې بهیر کوربه هم دی."
دا خبرپاڼه زیاتوي چې ولسمشر غني او د قطر امیر د خپلمنځي سوداګریزو او اقتصادي اړیکو پر پراختیا هم وغږېدل.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
ولسمشر غني د ناټو سرمنشي ین ستولتنبرګ سره هم پر افغان سوله ټلیفونې خبرې درلودې.
ښاغلی ستولتنبرګ خپل ټوېټر کې لیکي: د سولې خبرې اوږده او سخته لار لري، ماتېدونکي دي، خو د سولې لپاره خورا ښه چانس دی.
په قطر کې د افغانانو خپلمنځي خبرې د سپټمبر له ۱۲ پیل شوې، خو لا هم د طالبانو او افغان حکومت اړیکډلې د خبرو پر چلنلار سلا شوې نه دي.
د دې خبرو پیلېدو سره تمه دا وه چې افغانستان کې به تاوتریخوالی کم شي، خو د هیلې خلاف مختلفو ولایتونو کې د حکومتي ځواکونو او طالب وسلوالو ترمنځ تاوتریخوالی ډېر شوی او ښکېل لوري یې پړه پر یو بل اچوي.
