تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
عبدالله: د بندیانو تبادله دې بشپړه او بین الافغاني خبرې دې سملاسي پیل شي
د افغانستان د ملي مصالحې د عالي شورا مشر عبدالله عبدالله د افغانانو ترمنځ د خپل منځي خبرو د پیل پر وړاندې د پرتو خنډونو د له منځه وړلو غوښتنه کړې. ښاغلي عبدالله نن دوشنبه پر خپله ټوېټر پاڼه لیکلي چې د بندیانو د تبادلې بهیر دې بشپړ او بین الافغاني خبرې دې سملاسي پیل شي.
ښاغلی عبدالله په داسې حال کې دا څرګندونې کوي چې افغان حکومت او طالبان دواړه د خپلو پاتې بندیانو د خلاصون غوښتنه کوي.
طالبان ټینګار کوي چې د حکومت په بند کې د دوی پاتې ۴۰۰ بندیان باید ټول خوشي شي.
افغان حکومت د مشورتي لویې جرګې له سپارښتنې سره سم له دې ډلې تر اوسه اتیا تنه خوشي کړي، خو پاتې کسان لا هم نه دي خوشي شوي.
بل لور ته د ولسمشرۍ ماڼۍ هم تېره اوونۍ ویلي وو، له طالبانو سره د مخامخ خبرو د پیل لپاره اړینه ده چې دا ډله په خپل بند کې د افغان حکومت پاتې اسیران خوشي کړي.
د ولسمشرۍ ماڼۍ ویاند صدیق صدیقي تېره دوشنبه کابل کې یوې خبرې غونډې ته وویل، افغان حکومت د سولې لپاره څه باندې پنځه زره طالب بندیان خوشي کړل، خو اوس باید طالبان هم د حکومت پاتې بندیان خوشي کړي.
ښاغلي صدیقي که څه هم ونه ویل چې څومره شمېر حکومتي بندیان د طالبانو په بند کې دی، خو ټینګار یې وکړ چې د دې کسانو نه خوشي کول د سولې خبرو پر وړاندې یوازینی خنډ دی.
افغان او پاکستاني چارواکي کابل کې ناسته کوي:
بل لور ته په اسلام اباد کې سرچینو بي بي سي ته ویلي، افغان او پاکستاني چارواکي به راتلونکې اوونۍ په کابل کې د افغان سولې په تړاو خپلمنځي غونډه کوي.
سرچیني وایي، په دې غونډو کې به همدا راز د امنیتي او سوداګرۍ پر موضوعاتو خبرې کېږي.
دا په داسې حال کې ده چې په قطر کې د طالبانو د سیاسي دفتر یو پلاوی دا مهال اسلام اباد کې دی او تمه کېږي چې سبا سې شنبه به پاکستاني چارواکو سره وګوري.
د پاکستان د بهرنیو چارو وزیر شاه محمود قریشي دوشنبه اسلام اباد کې یوې خبري ناستې ته وویل، د ملا برادر په مشرۍ دا طالب پلاوی یې د افغان سولې په تړاو د سلا مشورو لپاره ور بللی دی.
د سولې په چارو کې د دولت وزارت ویلي پر طالبانو د پاکستان اغیز ته په کتو هیله مند دي چې دغه سفر وکولی شي د افغان سولې بهیر سره مرسته وکړي.
د دغه وزارت ویاندې ناجیې انوري بي بي سي ته وویل، هیله لري چې اسلام اباد په دې برخه کې مثبت رول ولوبوي.
