اروپايي ټولنې له عبدالله وغوښتل چې سیاسي کړکېچ سملاسي پای ته ورسوي
د عکس سرچینه، Abdullah
- Author, ګلستان شينواری
- دنده, بي بي سي لندن
اروپايي ټولنې پر عبدالله عبدالله غږ کړی، چې په افغانستان کې روان سیاسي کړکېچ سملاسي پای ته ورسول شي او په وینا یې که داسې و نه شي د افغانستان له امنیتي ځواکونو او پرمختیايي چارو سره پر مالي ملاتړ ناوړه اغېز کېدای شي.
دا څرګندونې له ښاغلي عبدالله سره د دې ټولنې د سفیرانو د پلاوي د مشر له خبرو وروسته شوې دي.
عبدالله عبدالله له اروپايي استازي سره له خبرو وروسته ویلي، چې د سیاسي کړکېچ اواري ته ژمن دی.
خو د هغه ګوند- جمعیت اسلامي- په یوه کلک غبرګون کې پر اروپايي ټولنې په دغه کړکېچ کې د یوې خوا د پلوۍ تور پورې کړی دی.
د اروپايي ټولنې دغه ګواښونکې څرګندونې پر داسې مهال مخې ته راځي، چې له تېرو کابو دوو میاشتو راهیسې د دې ټولنې او نور نړیوال استازي د عبدالله عبدالله او ولسمشر غني له ډلو سره د روان سیاسي کړکېچ د اواري لپاره پر خبرو اترو بوخت دي.
اوس په کابل کې له ښاغلي عبدالله سره د اروپايي ټولنې د سفیرانو د پلاوي د مشر او د ناروې د سفیر له ټیلیفوني خبرو وروسته اروپايي ټولنې په یوه ویناپاڼه کې ویلي، که په افغانستان کې سیاسي مخالفتونه روان پاتې شي، دا کار به د افغان ولس راتلونکی او روغتیا له ګواښ سره مخامخ کړي.
دې ټولڼې ټینګار کړی، چې د افغان وګړو ګټو ته باید لومړیتوب ورکړ شي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د اروپايي ټولنې په وینا، په اوسني وخت کې د کورونا ویروس د وبا پر وړاندې ګډې مبارزې او د سولې خبرو پیل ته سخته اړتیا ده.
دې ټولنې ویلي، ښاغلي عبدالله ته یې روښانه کړې، چې که د روان کړکېچ په اواري کې پرمختګ و نه شي، دا به د افغانستان د امنیتي ځواکونو او پرمختیايي چارو پر راتلونکې مالي مرسته هم بد اغېز وکړي.
ښاغلي عبدالله پر خپله ټوېټر پاڼه لیکلي، چې کورونا ضد مبارزې ته د پام ور ټولولو لپاره د سیاسي بندښت اواري ته لېوال دی.
هغه همداراز ویلي، چې د سولې لپاره یې پر اوربند هم ټینګار کړی دی.
جمعیت ګوند څه وايي؟
د عکس سرچینه، Getty Images
بل پلو د عبدالله عبدالله ګوند- جمعیت اسلامي- په یوه ویناپاڼه کې د اروپايي ټولنې څرګندونې یو اړخیزې بللې او تور یې پورې کړی چې د دې ټولنې دا خبرې، د جمعیت په ټکو، په افغانستان کې د ټاکنیزې کودتا په تړاو د اروپايي ټولنې د چوپتیا دوام ښيي.
جمعیت ټینګار کړی، چې په افغانستان کې سیاسي ټیکاو یوازې هغه مهال شونی دی، چې خلک په ملي پرېکړو کې ګډون ولري او عدالت او د وګړو حقونه خوندي شي.
دا ډله ښاغلی عبدالله د ټاکنو ګټونکی بولي او ادعا کوي، چې ولسمشر غني د درغلۍ په مټ بریالی اعلان شوی دی.
خو د ولسمشر غني ډله ټینګار کوي، چې ټاکنیزو کمېسیونونو د قانوني بهیر په پایله کې دغه پرېکړه کړې ده.
ارګ ټینګار کوي، چې د سیاسي کړکېچ د اواري لپاره خبرو ته چمتو دی او د داسې یوه حکومت د جوړولو ژمنه یې کړې، چې په وینا یې د افغانستان د ټولو خلکو استازي به کوي.
