اېن بي سي: ټرمپ له افغان تړون سره د سولې نوبل جایزې په لټه کې و

د امریکا اېن بي سي تلوېزون وايي، د امریکا ولسمشر ډونلډ ټرمپ پر خپلو ملګرو "ځانګړی فشار اچولی" چې د افغان جګړې د پای ته رسولو داسي نمایش جوړ کړي، چې ور سره دی د ټاکنیزې ژمنې پوره کول وښيي او د سولې نوبل جایزه ور کړل شي.

وروستیو ورځو کې د افغان ولسمشر محمد اشرف غني او پخواني اجرایه مشر عبدالله عبدالله ترمنځ د ستونزو نه اوارېدو او له طالبانو سره د امریکا د سولې تړون د اجرا له ځنډېدو د واشنګټن د پردې تر شا د پټې نارضایتۍ نوي اړخونه ښکاره کېږي.

د امریکا اېن بي سي چینل د اپرېل په اومه وویل، ولسمشر ټرمپ د سولې نوبل جایزې د ګټلو په تمه دوه اونۍ وړاندې د بهرنیو چارو وزیر مایک پمپیو کابل ته ولېږه.

* داسې سوله چې افغان ښځو ته یې هم خیر ورسېږي

* اروپايي ټولنه: افغان سوله کې ضمانت ته چمتو یو

* افغان سوله، شخصي ګټې او ملي اندېښنه

دوو پخوانیو او اوسنیو چارواکو دې تلوېزون ته ویلي، ښاغلي ټرمپ پر خپلو همکارانو ځانګړی فشار اچولی و چې د افغان جګړې د ختمولو او سولې تړون سره ده ته له اوازو داسې ډک نمایش جوړ کړي چې ور سره د سولې نوبل جایزه وګټي.

د امریکا ولسمشر د ۲۰۱۹ کال نومبر کې غوښتل ځینې طالب مشران کمپ ډېویډ ته وبلي، خو د دې ډلې د بریدونو ډېرېدو او یوه امریکايي سرتېري وژل کېدو پسې یې له طالبانو سره خبرې وځنډولې.

خو یوه لوړپوړي چارواکي ویلي، د ولسمشر سلاکارانو ورته وویل، چې افغان سوله "ورو، لړزېدونکی او سخت" بهیر دی او ولسمشر باید ځان له ماتېدونکي تړون سره مخ نه کړي.

دوه ورځې مخکې رویټرز خبري اژانس هم واشنګټن کې د دریو سرچینو له خولې ویلي و چې د افغان ځواکونو سره د امریکا د مرستو یو میلیارد ډالر به کم شي.

تر ډېره دا مرسته د تنخا، خوړو، سونتوکو، تجهیزاتو او بېخ بنسټو لپاره افغان پوځ او پولیسو ته ور کول کېږي.

دغه چارواکي دا هم ویلي چې کابل ته د مایک پمپیو له رسېدو مخکې ښاغلي ټرمپ خپله د ګواښ پیغام ور کړی و.

دا چارواکي وايي، ټرمپ په دې غوسه دی چې هیلې یې پوره نه شوې.

د سپینې ماڼۍ ویاندانو او د امریکا د بهرنیو چارو وزیر په دې هکله څه نه دي ویلي، خو د چارواکو په خبره، مایک پمپیو عبدالله ته ویلي چې "باید د غني ملاتړ وکړي" او د امریکا د ولسمشر دا پیغام یې ورساوه چې "له کابل یوازې یوه ډله" ور شي.

له مایک پمپیو سره تر لیدنې وروسته عبدالله عبدالله هم وویل، چې نوموړی د منځګړتوب لپاره نه و را غلی، بلکې غوښتل یې د سیاسي کړکېچ پر سملاسي اواري ټینګار وکړي.

ښاغلي عبدالله زیاته کړه، مایک پمپیو له نوموړي او ښاغلي غني غوښتي چې خپله حل پیدا کړي: "لار او لوری یې موږ ته پرېښودل".

اېن بي سي رپوټوي، یو بل چارواکي وویل، واشنګټن هیله من و چې د امریکا د ولسمشر اخطار به اغېزناک وي.

دغو چارواکو وویل، چې وروستیو اونیو کې د خپلو هیلو د نه پوره کېدو له امله ټرمپ غوسه دی.

ولسمشر غني او عبدالله عبدالله د پمپیو وړاندیز ونه مانه او ستونزې یې لا هم سره پاتې دي.

د امریکا د بهرنیو چارو وزارت مرستیالې الیس وېلز هم د اپرېل په شپږمه یوه ټوېټ کې لیکلي و، له افغانستان سره نړیوالې مرستې په دې ډول دوام نشي موندلی.

د بندیانو د ازادولو په هکله هم د افغان حکومت او طالبانو ترمنځ جنجال پاتې دی.

تېره اونۍ مایک پمپیو له طالبانو سره د حکومت د مرکچي پلاوي د اعلانېدو او د دواړو لورو د بندیانو د خوشي کېدو په هکله د پرمختګ هرکلی وکړ.

خو افغان حکومت د دوشنبې په ورځ وویل، ۱۵ طالب بندیان نه خوشي کوي او سې شنبه طالبانو وویل، له کابل خپل پلاوی ور غواړي چې د بندیانو پر خوشي کولو یې له حکومت سره خبرې کولې.

طالبانو دا هم ویلي چې د بندیانو بهیر کې خنډ او ځنډ د افغانانو خپلمنځي خبرې ځنډوي.