بلخ کې د نوروز مېلې لغوه کېدو سیمه ییز بازار ته ٪۹۰ زیان اړولی

د افغانستان په شمال کې ځايي چارواکي وايي، په بلخ کې کورونا ناروغۍ او د نوروز جشن لغوه کېدو په دې ولایت کې سیمه ییز بازار ته ۹۰ سلنه زیان رسولی.

د بلخ د سودګراۍ او صنایع خونې رئیس په خبره اوس ډېرو هوټلونو، رسټورانتونو د خوږو یا شیرنۍ خرڅولو بازار او سیمه ییزو تولیداتو چې نوروز ته یې تیاری نیوه خپلې چارې درولې دي.

په مزار شریف کې د کورونا لومړنۍ پېښې ثبتېدو سره په لومړي ځل حضرت علي ته منسوبه روضه د زیارت کوونکو پرمخ وتړل شوه او له ګرځندویانو وغوښتل شول، چې دې ښار ته دې سفر نه کوي.

په مزار شریف کې مشهور مېلمستونونه د نوروز په ورځو کې خالي دي.

د دغو مېلمستونو کارکوونکي وايي تېرکال نوروز ته لس ورځ پاتې وې او دوی هېڅ خالي خونه نه درلوده؛ خو سږ کال د جشن په لغوه کېدو او د کرونا وېروس له وېرې د دوی ټوله خواري په اوبو لاهو شوه.

د مزار شریف رستورانټونو کې به د نوروز په ورځو کې ځای نه و، خو اوس یې مشتریان کم شوي.

د یوه رستورانت کارکوونکې مروه وايي له نوروز یې‌ یوه میاشت مخکې رسټورانت نوی ډېزاین کړی و او د ښو خوړو چمتو کېدو پلانونه یې درلودل، خو هر څه په یو ځل له منځه لاړل:

"موږ نوروز لپاره ډېر چمتووالی درلود خپلو مشتریانو لپاره مو د ښو خوړه چمتو کېدو پلان درلود. د خپل رستورانت دیکور مو ښه ډېزاین کړی و، تر څو مشتریان راشي او نورور ونمانځي، خو اوس د کرونا ناروغۍ له امله څوک نه راځي موږ هیله لرو، چې دغه ستونزه حل شي."‎

په مزار کې د کورونا ناروغۍ د لومړنۍ پېښې ثبتېدو سره په لومړي ځل د روضې مبارکې دروازې د زیارت کوونکو پرمخ وتړل شوې او د نوروز جشن لغو شو.

په تېرو کلونو کې به د نارینه او د ښځو سنګارتونونه د نوروز په نژدې کېدو سره له مشتریانو ډک و، خو سږ کال ډېری لکه د ظریف په څېر په خپل دوکان کې یواځې ناست دي او ورځني مشتریان یې هم له لاسه ورکړي.

نوموړي وايي د نوروز جشن په لغو کېدو او د کورونا ناروغۍ له وېرې د دوی مشتریان ډېر کم شوي او په ورځ کې ورته د ګوتو په شمېر راځي، چې د دوی کاروبار یې له خنډ سره مخ کړی.

په بلخ کې د سوداګرۍ او صنایع خونې رئیس آرش یونسي وايي د نوروز جشن په لغو کېدو او د کورونا ناروغۍ له امله د دې ولایت سیمه ییز بازار ته ۹۰ سلنه زیان اوښتی:

"‎موږ هر کال د افغانستان له بېلابېلو سیمو د نوروز جشن لپاره چې په مزار شریف ښار کې د څلوېښتو ورځو لپاره لمانځل کېده، ګڼ شمېر مېلمانه درلودل، خو سږ کال موږ د خوراکي موادو له اړخه ډېر زیان ولید. نژدې ۹۰ سلنه د خوراکي موادو تولید او خرڅلاو کم شوی او هوټلونه خالي پاتي. ‎"

په تېرو کلونو کې په دې ورځو کې د موسیقۍ پروګرامونو د ډېری ګرځندویانو پام ور اړولی و.

مېرمنو هم د سمنک پخولو او د سندرو ویلو دودیز پروګرامونه درلودل.

د نوروز په ورځو کې به ګڼ شمېر ځوانان روضې ته څېرمه په طبله وهلو او په اتڼ او ګډا بوخت ول.

افغان حکومت د کورونا وېروس د خپرېدو د مخنیوي لپاره په بلخ کې د نوروز لرغونی جشن لغوه کړ چې له افغانستان او نړۍ به زرګونه خلک ورته راتلل.