د هغو ۲ افغان توکمو محاکمه چې ایران ته په جاسوسۍ تورن دي

جرمني کې د دوشنبې په ورځ د هغې افغان جوړې (مېړه او مېرمن) محاکمه وشوه چې ایران ته په جاسوسۍ تورن دي.

فرانس خبري اژانس وايي، دغه ۵۱ کلن افغان جرمن پوځ کې سلاکار و او په دې تورن دی چې ۱۸ برخو کې یې ایران ته د جرمني د پټو مالوماتو لېږدولو سره "سخت خیانت" کړی دی.

د عبدالحمید.س په نوم دا کس د تېر کال جنورۍ کې له یوه بهرني سفر- چې ویل کېږي د مالوماتو لېږدولو لپاره و- تر ستنېدو وروسته ونیول شو.

د نوموړي مېرمن ۴۰ کلنه اسیه هم له ورته تور سره مخ ده.

د جرمني لوېدیځ ته د کوبلنتس محکمې چارواکي وايي، اسیه. س تورنه ده چې له اوله د خپل خاوند له جاسوسي چارو خبره وه او د ایران له استخباراتو ادارې سره یې همکاري کړې ده.

* جرمني کې د یو میلیارد ډالرو په ارزښت الماس غلا شوي

* د جرمني دفاع وزیره: راتلونکی افغان حکومت باید د سولې خبرې لا پیاوړې کړي

تېر کال د ایران د بهرنیو چارو وزارت ویاند بهرام قاسمي د دغه افغان توکمه جرمن د نیولو خبر ته غبرګون کې وویل، دا کس له ایران سره هیڅ اړیکه نه لري.

نوموړي دا مسله د داسې کسانو هڅه وبلله چې "د اروپا- ایران د اړیکو خرابول" غواړي.

دغه کس د کلونو لپاره د جرمني دییون ښار کې د جرمن پوځ يوه مرکز کې د ژباړن او کلتوري سلاکار دنده درلوده.

د جرمني دفاع وزارت هم ویلي چې د پوځ اړوند یوې جاسوسۍ دوسیې ته د رسیدګۍ په هکله خبر دي، خو رسنیو ته یې نور مالومات نه دي ور کړي.

تمه ده چې د دې دوو افغانانو د محاکمې ډېرې پټې ناستې وشي.

که ګناګار وپېژندل شي، خپله عبدالحمید.س په ۱۵ کاله او مېرمن یې په ۱۱ کاله بند محکومېږي.

له دې مخکې د جرمني شپېګل مجلې خپل رپوټ کې ویلي چې تورن کس ډېر کلونه افغانستان کې د جرمني د پوځي ماموریت اړوند سندونو په ګډون ډېرو منظمو او حساسو اطلاعاتو ته لاسرسی درلود.

د دې رسنۍ د رپوټ له مخې، پر ۲۰۱۷ کال د جرمني د جاسوسۍ ضد اداره پوځ کې پر یوه جاسوس پوه شوه.

اړوند چارواکي له هغه وروسته پر عبدالحمید.س شکمن شول چې پام یې شو د اروپا ځانګړو هېوادونو ته د ایران د لوړپوړو استخباراتي چارواکو له سفر سره هممهال نوموړی هم دغو هېوادونو ته ځي.

د جرمني د کورنیو اطلاعاتو د اساسي قانون ساتونکې څانګه وايي، ایران، چین او روسیه درې داسې هېوادونه دي چې جرمني کې له نورو ډېره جاسوسي کوي.