ملا برادر تهران کې ایراني چارواکو سره پر افغان سولې غږېدلی
د عکس سرچینه، Getty Images
طالبانو ویلي چې د ملا عبدالغني برادر په مشرۍ د دوی یوه پلاوي په پلازمېنه تهران کې د ایران له بهرنیو چارو وزیر سره ولیدل. په قطر کې د طالبانو د سیاسي دفتر ویاند سهیل شاهین پر خپله ټویټر پاڼه لیکلي، دې پلاوي په افغانستان کې د سولې د بهیر په اړه له ایراني وزیر جواد ظریف سره خبرې وکړې.
نوموړي زیاته کړې چې دواړو لوریو د افغان سولې بهیر او افغانستان کې د روانې شخړې د سوله ییز هواري په تړاو خبرې کړي.
د ښاغلي شاهین په وینا، ایران ته د طالبانو تللي پلاوي همدا راز ایراني چارواکو ته د افغان کډوالو د ستونزو یادونه کړې او ایراني چارواکو یې د هواري ډاډ ورکړی.
د ایران دولتي رسنۍ ایرنا ویلي، د طالبانو له پلاوي سره په لیدنه کې ددې هېواد د بهرنیو چارو وزیر له افغانستان سره د دوه اړخیزو اقتصادي او کلتوري همکاریو د پراخولو ډاډ ورکړی.
ایرنا د دغه هېواد د بهرنیو چارو وزارت د سرچینو له قوله لیکلي: "د دواړو لوریو لیدنه افغانستان ته د سولې اوثبات د بېرته ستنېدو په اړه ترسره شوې ده او هدف یې د خبرو له لارې د افغانستان د ستونزو حل لپاره او د بین الافغاني خبرو د اړخونو هڅول دي."
ایران ته د طالبانو وروستي سفر ته تر اوسه افغان حکومت څه غبرګون نه دی ښودلی.
له امریکا سره د سولې د خبرو له لغوه کېدو وروسته دا دویم ځل دی چې د طالبانو پلاوی له ایراني چارواکو سره خبرو لپاره تهران ته سفر کوي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
په تېر سپټمبر کې هم د دغه ډلې یو پلاوی ایران ته تللی و او د هغه هېواد د بهرنیو چارو له چارواکو سره یې کتلي و. ایران ته د طالبانو تېر سفر د افغان حکومت له سختو نیوکو سره مخ شوی و.
د افغان ولسمشر ویاند صدیق صدیقي ویلي و، د دغه ډلې کوربه توب د هېوادونو د خپلمنځیو اړیکو د ټولو اصولو خلاف کار دی.
ایران ته د طالبانو د پلاوي وروستی سفر داسې مهال مخې ته راځي چې له طالبانو سره د سولې خبرو د بیا پیلېدا هڅې ورستیو کې ډېرې شوې دي.
د طالبانو یوې سرچینې بي بي سي ته منلې وه چې زلمي خلیلزاد قطر کې د طالبانو له استازو سره نارسمي کتلي و. بل خوا، په پام کې وه چې د چین په بیجینګ کې د افغان سولې په تړاو له طالبانو سره د خبرو ناسته جوړه شي.
د عکس سرچینه، GETTY IMAGES / ARG
په تازه پرمختګ کې طالبانو ویلي، د افغان د بیجینګ په جوړېدونکې غونډه کې خنډ رامنځته شوی دی. طالبان وايي، ستونزه د افغان حکومت له خوا د ګډونوالو د برابر شوي لېست او د غونډې د اجندا د څرنګوالي پر سر را ولاړه شوې.
بل لورته د سولې په برخه کې د افغان دولت وزارت وایي، دوی له خپله اړخه د بیجینګ غونډې ته چمتوالی لري او د کوربه هېواد او طالبانو د چمتوالي د اعلان په تمه دی.
پخواني ولسمشر حامد کرزي ویلي چې د ولسمشر محمد اشرف غني په غوښتنه یې خپل نوم د بیجنیګ غونډې د ګډونوالو له لېسته لېرې کړی دی.
