د سولې د پلان په هکله د عبدالله څرګندونو ته د ارګ غبرګون
د عکس سرچینه، Arg
افغان ولسمشرۍ ماڼۍ د ولسمشر غني د سولې ۷ ماده يي طرحې په تړاو د اجرایه مشر عبدالله عبدالله څرګندونو ته په غبرګون کې وايي، چې دا طرحه د سولې د ترلاسولو لپاره څرګندې موخې لري.
اجرایه مشر عبدالله عبدالله د سې شنبې په ورځ له فرانس پريس خبري اژانس سره مرکه کې دا طرحه خیالي وبلله:
"که ریښتیا ووایو، هیچا هم هغه څه ته چې اوه ماده يي پلان بلل کېږي پلان نه دي ویلي.. دا یوازې هیله ده".
خو دولسمشر ویاند صدیق صدیقي وايي، دا طرحه د بې مانا جګړې د پای ته رسولو لپاره د ولسمشر غني د تېرو پنځو کلونو پرلپسې کار او ملي اجماع په پایله کې رامنځ ته شوې ده.
ښاغلي صدیقی خپله ټویټر پاڼه کې لیکلي: "دا پلان د سولې بهیر کې د راتلونکو ګامونه پایښتي پایله باوري کوي او د ټولشمولیت، پایښت او عزت اصول ډاډمنوي".
دا ارګ غبرګون کې دا هم ویل شوي چې دا پلان د ټیکاو لپاره د تېرو هڅو او پورته شویو ګامونو لړۍ ده چې موخه یې ژر تر ژره د وینې بهولو مخنیوی دی.
د طالبانو او امریکا له نهم پړاو خبرو وروسته تمه وه چې دواړه لوري یوې هوکړې ته ورسېږي، خو کابل کې د طالبان په یو ځانمګی برید کی د یوه امریکاي په ګډون د ۱۲ کسانو وژل کېدو سره د امریکا ولسمشر ټرمپ دا خبرې لومړی وځنډولې بیا یې مړه وبللې.
مګر له هغه راهیسې افغان کشاله کې ښکېل لوري د دې خبرو بیا پیلېدل غواړي.
د چین خبرې
د عکس سرچینه، AFP
تمه ده چې روانه میلادي میاشت د افغانانو خپلمنځي خبرې په چین کې وشي.
له مسکو او قطر وروسته دا وار چین د افغانانو خپلمنځي خبرو کوربه توپ کوی.
طالبانو ویلي چې د ملابرادر په مشرۍ یو پلاوی یې دې خبرو کې ګډون کوي.
افغان حکومت هم وايي د دې خبرو لپاره یې پلاوی برابر کړی دی خو تر اوسه د افغان حکومت پلاوی جزییات نده په ډاګه شوي.
