پر افغان سوله د ولسمشر غني او د چین د بهرنیو چارو وزیر خبرې

افغان ولسمشر محمد اشرف غني او د چین د بهرنیو چارو وزیر وانګ يي په بېجینګ کې د افغان سولې په تړاو پر جوړېدونکې ناسته د دوشنبې په ورځ ناوخته سره وغږېدل.

بي بي سي ته د ارګ یوې نږدې سرچینې ویلي، د افغان سولې په تړاو د بېجینګ خبرې د ولسمشرۍ ټاکنو له لومړنیو پایلو تر اعلان وروسته د روانې نومبر میاشتې په وروستیو کې پیلېږي.

د ارګ خبرپاڼه وايي، دې ټلېفوني خبرو کې چینايي وزیر وانګ يي ولسمشر غني ته د دې غونډې په تړاو مالومات ور کړل:

دواړو لورو ټینګار وکړ چې د افغان سولې بهیر کې باید افغان حکومت او خلک بنسټیز رول ولري.

په پام کې وه د افغان سولې په اړه د تېر اکټوبر پر ۲۹ او ۳۰ د چین په کوربتوب په بېجېنګ کې د طالب او افغان حکومت استازو په ګډون ناسته شوې وی، خو تر نامالومې نېټې وځنډېده.

* اروپايي ټولنه: افغان سوله کې ضمانت ته چمتو یو

* افغان سوله، شخصي ګټې او ملي اندېښنه

هغه مهال وسلوالو طالبانو په یوه خبرپاڼه کې روښانه کړې وه چې په دې ناسته کې د ملا عبدالغني برادر په مشرۍ د دوی یو پلاوی ګډون کوي.

خو د سولې په برخه کې د افغان حکومت وزارت ویل، د دې ناستې په هکله له چینايي چارواکو سره خبرې کوي او که دې برخه کې د منلو وړ معیارونه په پام کې ونیول شي، نو دوی به پکې د ګډون پرېکړه وکړي.

مګر وړمه ورځ( د نومبر ۳) د افغانستان د ولسمشرۍ ماڼۍ ویاند صدیق صدیقي وویل، په چین کې له وسله والو طالبانو سره د بین الافغاني ناستې لپاره افغان حکومت خپل پلاوی ټاکلی او غونډې ته نژدې ورځو کې به یې اعلان کړي.

له دې مخکې ولسمشر غني د افغان سولې په تړاو خپله یوه طرحه وړاندې کړه او ارګ ویلي، له ګاونډیو، سیمه ییزو او په افغان سوله کې له ښکېلو هېوادونو یې غوښتي چې د سولې لپاره د افغان حکومت د طرحې ملاتړ وکړي.

له نورو ناستو سره د بېجنیګ د ناستې توپیر

یوې سرچینې بي بي سي ته ویلي، د بیجنګ غونډه به په قطر کې د طالبانو او امریکایانو، او همدا راز د افغان سولې په اړه له نورو پخوانیو غونډه جلا وي.

دا سرچینه زیاتوي، د بیجنګ په غونډه کې به د بحث اجنډا بدله وي، او پر یو لړ نورو نویو موضوعاتو به د ټولو ښکېلو غاړو ترمنځ خبرې اترې کېږي.

* افغان سوله کې د ښکېلو اړخونو ګټې او تګلارې

* خلیلزاد ته افغان سوله کې ترکمنستان ولې مهم دی؟

د ولسمشر محمد اشرف غني ویاند صدیق صدیقي د یکشنبې پر ورځ کابل کې یوې خبري غونډې ته وویل، د بیجنګ ناستې لپاره د افغان پلاوي په اړه له سیاسي ډلو او نورو خواو سره سلا مشورې شوې دي.

ښاغلي صدیقي وویل، دا ټاکل شوی پلاوی کولی شي د افغانستان، جمهوریت او هغو ټولو ارزښتونو دفاع وکړي چې په خوره لوړه بیا ترلاسه شوي او ساتل شوي.

د افغانانو خپلمنځي خبرې

د افغانانو خپلمنځي خبرې لومړی مسکو او بیا قطر کې وشوې.

ور سره هممهال د طالبانو او امریکا خبرې هم روانې وې او تر نهم پړاو خبرو وروسته تمه وه د سولې تړون وشي.

خو د امریکا ولسمشر ډونلډ ټرمپ په تېرسپټمبر کې د یوه خونړي برید په غبرګون کې چې د یوه امریکايي سرتیری په ګډون ۱۲ کسان پکې ووژل شو له طالبانو سره د سولې خبرې لغوه اعلان کړې.

خو له هغه راهیسې پر افغان خواوو سربېره اروپايي ټولنه، روسیه، ایران پاکستان او د افغان کشالې نور ښکېل لوري د دې خبرو بیا پیلېدل غواړي