تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د ټاکنیزو کمیسیونو پخواني مشران او ۹ نور چارواکي په بند محکوم شول
په کابل کې یوې لومړنۍ محکمې نن د سه شنبې پر ورځ د افغانستان د ټاکنو خپلواک کمېسیون او ټاکنیزو شکایتونو کمېسیون د پخوانیو مشرانو په ګډون لس پخواني غړي په پنځه پنځه کاله بند محکوم کړل. په دوی کې د ټاکنو د کمیسیون پخوانی مشر عبدالبدیع صیاد او د ټاکنیزو شکایتونو کمیسیون پخوانی مشر عبدالعزیز اریایي هم شامل دي.
پر دې چارواکو تور و چې په تېرو پارلماني ټاکنو کې یې رایو شمېرنه کې لاسوهنه کړې او له خپلو دندو یې ناوړه ګټه اخیستې.
دا حکم د درنو جرمونو سره د مبارزې د عدلي او قضايي مرکز د محکمې د ناستې په دوېیمه ورځ صادر شو. یاده محکمه وايي دا تورن کسان د استیناف حق لري.
په همدې محکمه کې د ټاکنو د کمیسیون د ټکنالوژۍ او د دارالانشا پخواني رییسان بري شول.
د افغانستان تېرې پارلماني ټاکنې له ناندریو ډکې وې او پخپله افغان حکومت او ولسمشر محمد اشرف غني هم اعتراف کړی چې جدي ستونزې یې درلودې.
د دې ټاکنو پایلې له کابو شپږم میاشتو ځنډ وروسته پیل شوې، خو شمېر کاندیدان چې دې ټاکنو کې ناکامه اعلان شوي وو، تر اوسه پورې د پایلو پر ضد احتجاجونه کوي.
په دوی کې یو شمېر هغه ښځینه کاندیدانې هم دي چې په پلازمېنه کابل کې یې له څو میاشتو راهیسې د اعتراف خیمه درولې وه، خپلې شونډې یې ګڼدلې وې او یو مهال یې ځانونه په پنجره کې بند کړي وو.
ولسمشر غني په فبرورۍ میاشت کې د دواړو کمېسیونونو د دارالانشاء مشران، د کمېسیونونو د سرپرستانو په توګه وټاکل. له هغه وروسته د افغانستان لویې څارنوالۍد ټاکنو کمېسیونونو مشران ممنوع الخروج اعلان کړل.
له دې ګام وروسته د دواړو کمیسیونونو مشرانو د ولسمشر پرېکړه د قانون خلاف بللې وه او د ارګ د حکم د نه منلو اعلان یې کړی و.
