ولسمشریزې ټاکنې: لګښت یې نژدې ۲۰۰ میلیونه ډالرو ته رسېږي
د افغانستان ټاکنو خپلواک کمېسیون مسوولین وايي، د دوی د اټکل له مخې د افغانستان راتلونکو ولسمشریزو ټاکنو لومړنی لګښت به ۱۹۲ میلیونو ډالرو ته ورسېږي.
د دغه کمېسیون یوه غړی مولانا محمد عبدالله وايي، د نړیوالو ادارو تر څنګ به افغان حکومت هم د دغه لګښت یوه برخه پر غاړه واخلي. هغه وايي:
''دغه دواړه سرچینې همکارې دي، خو د دوی همکارۍ د ټاکنو کمېسیون له لوري د لګښتونو مشخصې طرحې پورې تړلې دي. ''
له دې مخکې ویل شوي وو، چې د ټاکنو لپاره د لګښت پیسو موندلو کې ستونزې شته او تمویلونکو ادارو خپلې مرستې په دغه بهیر کې په اصلاحاتو پورې تړلې دي.
د عکس سرچینه، Getty Images
د افغانستان ولسمشریزې ټاکنې به له پروګرام سره سم د روان کال تلې یا میزان میاشتې پر شپږمه نېټه کېږي.
د افغانستان پارلماني ټاکنو لګښت چې د تېر کال تلې میاشت کې وشوې، ۱۲۰ میلیونه ډالره و، چې ۱۱ میلیونه یې افغان حکومت ورکړ.
د افغان ټاکنو ډېر لګښت د ټاکنیزو موادو پر پېرلو او د تجهیزاتو پر لېږدولو او دغه راز د ټاکنو بهیر کارکوونکو پر حق الزحمه کېږي.
بل لور ته همدا نن 'پنجشنبه مارچ ۲۸ ' د افغان امنیتي ادارو او ټاکنو خپلواک کمېسیون تر منځ یوه هوکړه لاسلیک شوه.
د عکس سرچینه، Getty Images
په دې مناسبت یوې غونډې ته وینا کې د افغانستان کورنیو چارو وزارت چار سمبالي مسعود اندرابي وویل، 'د هېواد امنیتي ځواکونه د راتلونکو ټاکنو لپاره د امنیت خوندي ساتلو ته ژمن دي. '
نوموړی وايي، د تېرو ټاکنو نیمګړتیاوو ته په پام سره به د نوم ثبتولو له بهیره نیولې بیا د موادو انتقال، کاندیدانو امنیت او د رایې اچوونې تر پړاوه پورې د ټاکنیزو مرکزونو امنیت خوندیتوب باوري شي.
