له زندانه خوشې کېدونکې کندهارۍ بندیانې 'ځای نه لري'

د افغانستان سوېل کندهار ولایت کې د بشري حقونو فعالین وايي، یوشمېر بندي مېرمنې، چې د حبس موده یې بشپړه کړې، لاهم په زندانونو کې پاتې دي؛ ځکه چې له زندانه د باندې د اوسېدو ځای نه لري.

د زندان چارواکي وایي، دوی یوه ګړۍ هم ددې ډول مېرمنو د ساتنې مسؤولیت نه لري، خو دغه اداره وایي د کورنیو د مخالفتونو او یا هم خپله مېرمنې نه غواړي بېرته کورته ولاړې شي ځکه یې دوی دلته ساتنه کوي.

په یو شمېر ولایتونو کې د دغه ډول ښځو لپاره د حکومت او مرستندویه ادارو له خوا امن ځایونه جوړ شوي.

۲۰ کلنه معصومه د پلار له کوره د تښتېدلو په جرم زندان ته لوېدلې .

معصومې د خپل حبس موده پوره کړې، خو دا لاهم زندان کي شپې ورځي تېروي او وایي نه غواړي هغه کورته ور وګرځي چي ترې د تښتېدو له کبله نن په زندان کې ده .

دا یوازي د معصومې داستان نه دی، د زندان چارواکي وایي په تېرو څو میاشتو کې څو نورو ورته قضیو سره هم مخ شوي دي.

'کندهار زندان کې پر ښځینه بندیانو جنسي تېری نه دی شوی'

''د کندهار زندان کې بې ګناه کسان ساتل کېږي''

د کندهار د سرپوزې زندان مرستیال څارنمن محمد یوسف وایي په تېرو شپږو میاشتو کې درې نورې مېرمنې له دوی سره زندان کې پاتې دي.

بندیان د اوږ بار

هغه وايي، په زندان کې له ټاکل شوې مودې د ډېر وخت لپاره د پاتې کېدونکو زندانیانو پالنه او ساتنه پر دوی بوج دی.

دا ستونزه یوازې تر کندهار محدوده نه ده، بشرپالان وایي په روزګان، هلمند او زابل کې هم هغه ښځې، چې د حبس موده یې بشپړه کړې وي بیا هم زندان کې ساتل کېږي .

په کندهار کې د بشري حقونو خپلواک کمیسیون د سیمه يیز دفتر مشر فخرالدین فایز وایي د حبس د مودې تر پوره کولو وروسته په زندان کې پاتې کېدو ته د ښځو مجبوریت د دوی پر بشري حقونو تېری بلل کېږي .

ښاغلي فایز وایي دا د حکومت دنده ده چې په هر ولایت کې ددغو مېرمنو د ساتنې غم وخوري .

پلازمېنه کابل کې شپږ د امن خونې شته او هغه ښځې په کې ساتل کېږي، چې د مېړه یا پلار له کوره تېښتې ته اړایستل شوې دي او یا هم له زندان تر خوشې کېدو وروسته یې کورنۍ منلو ته نه وي چمتو.

په کندهار کې د ښځو چارو مشره رقیه اڅګزۍ وایي، دغه ولایت کې د امن خونې د نشتوالي یو لامل د وخت چارواکو او قومي مشرانو مخالفتونه وه.

څه موده وړاندې د ښځو چارو مرستیال وزیري کندهار ته د سفر پرمهال له ځايي چارواکو سره د لیدنې پرمهال ویلي وو، دغه ولایت کې د ښځو پر وړاندې د تاوتریخوالي د کمولو لپاره د امن خونې جوړول خورا اړینه ده.

دغه چارواکي ویلي وو، هڅه کوي ددغو اسانتیاوو د برابرولو لپاره مالي امکانات برابر کړي.