فراه کې پر ګاډي چاودنې ۱۱ کسان ووژل او ۳۷ ټپیان کړل
د عکس سرچینه، .
فراه کې ځايي چارواکي وايي، د دغه ولایت د فراه رود ولسوالۍ په بالاک بلوک سیمه کې د سپرلۍ ګاډۍ په ماین ختلی چې له امله یې ۴۸ کسانو ته مرګ ژوبله اوښتې ده.
د فراه د والي ویاند محمد نصیر مهري د بي بي سي خبریال محفوظ ذبیدي ته وویل، چې موټر د وسلوالو له خوا په سړک کې د اېښودل شوي ماین ختلی دی.
"پېښه سهار مهال ۴:۳۰ دقیقې شوې او د احمدشاه ابدالي شرکت موټر چې له هرات- کابل ته روان و، په لخشک سیمه کې په ماین ختلی دی".
د نوموړي په خبره، په پېښه کې د یوې ښځې په ګډون ۱۱ کسان وژل شوي او د مېرمو او ماشومانو په ګډون ۳۷ کسان ټپي دي.
ارګ رسنیو ته په استولې اعلامیه کې د ولسمشر غني له خولې پر دغه پېښه خواشیني ښودلې ده.
"ملکي وګړو په ځانګړي ډول علماوو، ښځو او کوچنیانو ته زیان اړول د افغانستان د دیني علماوو متفقې فتوا او د اسلامي نړۍ د علمای کرامو له اعلامیې سره چې په افغانستان کې یې مسلمان وژنه او روانه جګړه حرامه بللې، په ټکر کې دی".
د عکس سرچینه، عبدالله یاد
افغانستان کې پر جګړه سربېره د ښکېلو لورو د ماینونو له امله هم وخت ناوخت ولس ته مرګ ژوبله اوړي.
د یوناما د روانې میاشتې د ۱۵ نېټې رپوټ وايي، چې د جګړې د ښکیلو اړخونو له خوا ولس ته د تر ټولو ډېر زیان اوښتل دوام لري.
د دې ادارې په رپوټ کې د ولسي مرګ ژولې لوی لامل ځانمرګي بریدونه، بیا هوايي عملیات او همدارنګه ناچاودي مهمات او ماینونه ښودل شوي دي.
