تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
فراه کې پر ګاډي چاودنې ۱۱ کسان ووژل او ۳۷ ټپیان کړل
فراه کې ځايي چارواکي وايي، د دغه ولایت د فراه رود ولسوالۍ په بالاک بلوک سیمه کې د سپرلۍ ګاډۍ په ماین ختلی چې له امله یې ۴۸ کسانو ته مرګ ژوبله اوښتې ده.
د فراه د والي ویاند محمد نصیر مهري د بي بي سي خبریال محفوظ ذبیدي ته وویل، چې موټر د وسلوالو له خوا په سړک کې د اېښودل شوي ماین ختلی دی.
"پېښه سهار مهال ۴:۳۰ دقیقې شوې او د احمدشاه ابدالي شرکت موټر چې له هرات- کابل ته روان و، په لخشک سیمه کې په ماین ختلی دی".
د نوموړي په خبره، په پېښه کې د یوې ښځې په ګډون ۱۱ کسان وژل شوي او د مېرمو او ماشومانو په ګډون ۳۷ کسان ټپي دي.
ارګ رسنیو ته په استولې اعلامیه کې د ولسمشر غني له خولې پر دغه پېښه خواشیني ښودلې ده.
"ملکي وګړو په ځانګړي ډول علماوو، ښځو او کوچنیانو ته زیان اړول د افغانستان د دیني علماوو متفقې فتوا او د اسلامي نړۍ د علمای کرامو له اعلامیې سره چې په افغانستان کې یې مسلمان وژنه او روانه جګړه حرامه بللې، په ټکر کې دی".
افغانستان کې پر جګړه سربېره د ښکېلو لورو د ماینونو له امله هم وخت ناوخت ولس ته مرګ ژوبله اوړي.
د یوناما د روانې میاشتې د ۱۵ نېټې رپوټ وايي، چې د جګړې د ښکیلو اړخونو له خوا ولس ته د تر ټولو ډېر زیان اوښتل دوام لري.
د دې ادارې په رپوټ کې د ولسي مرګ ژولې لوی لامل ځانمرګي بریدونه، بیا هوايي عملیات او همدارنګه ناچاودي مهمات او ماینونه ښودل شوي دي.
