تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ټاکنیز کمیسیون: د رای ورکوونکو د ثبت بهیر باطلول ټاکنې کړکېچ ته بیايي
په داسې حال کې چې افغانستان کې پارلماني ټاکنو ته نژدې درې میاشتې پاتې، ځینو لویو سیاسي ګوندونو د ټاکنو له کمیسونه د رای ورکوونکو د نوملیکنې د بهیر باطلولو غوښتنه کړې چې وايي له الکترونیک سیستم سره دې بېرته له سره پیل شي.
د ټاکنو کمیسیون د دوی دا غوښتنه نه عملي کېدونکې او ټاکنیز بهیر د کړکېچ لوري ته بېول بللي دي.
د افغانستان راتلونکو پارلماني ټاکنو ته نژدې نهه میلیون رای ورکوونکي د خپلو تذکرو (پېژندپاڼو) له لارې ثبت شوي.
د شنبې په ورځ د سیاسي ګوندونو په خبرپاڼه کې د رای ورکوونکو د نوملیکنې اوسنی بهیر د وخت ضایع کول او د میلیونونو ډالرو بې ځایه لګول او دا بهیر "نیمګړی او درغلیو ته لار هواروونکی" بلل شوی.
دوی د رای ورکوونکو د نوملیکنې بهیر له سره پیلېدل او د ګوتو په نښې ثبتول غواړي.
افغانستان کې ټاکنو ته د رای ورکوونکو د نوملیکنې بهیر د تېرې وري/حمل میاشتې پر ۲۵مه پیل شو چې د چنګاښ تر نیمايي یې دوام وکړ.
د ټاکنیز کمیسیون غبرګون
د ټاکنو خپلواک کمیسیون یو غړی او ویاند حفیظ الله هاشمي وايي، اوس د ټاکنیز قانون او د سیستم بدلولو وخت تېر شوی او د تلې ۲۸ ټاکنو ته ټول چمتووالی نیول شوی دی.
دی وايي، د سیاسي ګوندونو د غوښتنې منل ټاکنو ته ټاکل شوې نېټه له ستونزو سره مخامخوي او دا غوښتنه یې نه عملي کېدونکې ده.
ښاغلي هاشمي له دغو سیاسي ګوندونو وغوښتل، چې له کمیسیون سره همکاري وکړي او خپل څارنیز رول لا پیاوړی کړی.
په پام کې ده چې د افغانستان پارلماني ټاکنې د راتلونکې میزان/تلې میاشتې وروستیو کې وشي.
د افغانستان پارلماني ټاکنې تر خپل وخت درې کاله ځنډول شوې او دا لومړی ځل دی چې افغانستان کې د ولسوالیو شوراګانو ته ټاکنې کېږي.
