تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
"بدخشان ولایت کې طالبانو ۳۵ سیمه ییز پولیس وژلي"
په شمال ختیځ بدخشان ولایت کې دولتي چارواکي وايي چې وسله والو طالبانو د قومندان په ګډون ۳۵ سیمه ییز پولیس لومړی نیولي او بیا یې وژلي دي.
د بدخشان د ولایتي شورا غړي کامل بېک حسیني بي بي سي ته وویل چې دغه پېښه د تګاب په ولسوالۍ کې شوې ده.
دی زیاتوي، طالبانو نن د تګاب له ګاونډي ولسوالۍ یمګان له لوري پراخ برید وکړ چې ورسره سیمه ییز پولیس له سیمې په شا شول، خو د تېښتې پرمهال د طالبانو له کمین سره مخ شول.
د ده په وینا، د سیمه ییزو پولیسو قومندان ضمیر هم په وژل شویو کې دی. یو شمېر نور پولیس بیا طالبانو سره جګړه کې ټپيان شوي.
طالبانو د برید مسوولیت منلی او ویلي یې دي چې ۳۵ سرتېري یې وژلي او یو شمېر کلي یې نیولي دي.
خو د بدخشان والي احمد فیصل بېګزاد بي بي سي ته وویل چې د یوه قومندان په ګدون ۱۱ سیمه ییز پولیس وژل شوي او نژدې ۲۰ کسه نور ورک دي.
تر دې وړاندې یوې سیمه ییزې سرچینې بي بي سي ته د طالبانو په لاس د ۴۰ سیمه ییزو پولیسو د وژل کېدو خبر ورکړی و.
بدخشان ولایت ورځ تر بلې ورځې ناارامه کېږي او طالبانو د خپلو بریدونو او عملیاتونو لمن پراخه کړې ده.
