تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
پکتیکا کې چاودنې د مدرسې د ماشومانو په ګډون ۱۲ کسان وژلي
د افغانستان په سوېل ختیځ ولایت پکتیکا کې د ولسي وګړو پر موټر د سړک غاړې ماین چاودنه کې د دوو مدرسو د ۷ ماشومانو زده کوونکو په ګډون ۱۲ کسان وژل شوي دي.
د پکتیکا والي الیاس وحدت وایي، چاودنه د پنجشنبې په ورځ غرمه مهال د پیر قوتي په سیمه کې شوې ده چې له ارګون ښار نه ۱۵ کیلومتره لرې پرته ده.
د ښاغلي وحدت په وینا په چاودنه کې وژل شوي ټول ماشومان زده کوونکي ول. دی وايي "پنځه کسان یې د یوې مدرسې او دوه د بلې مدرسې زده کوونکي ول چې د اورګون په دارالعلوم او قلندریه مدرسو کې یې زده کړې کولې".
په چاودنه کې هغه ولسې وکړي هم وژل شوي چې ښار ته د سودا اخیستو او دارو درملو په موخه تلل.
ښاغلی وحدت دا برید "غیر انساني" بولي وايي دا د دولت د مخالفینو له خوا تازه ځای پر ځای شوی مین و.
پکتیکا ولایت نه یوازې دا چې د یو شمېر نورو ولایتونو په شان د پوځي او وسله والو فعالیتونو له کبله ناارام دی بلکې لویو چاودنو هم ګڼو ولسي وګړو ته مرګ ژوبله اړولې ده.
د ۱۳۹۳ کال لیندۍ میاشت کې د والیبال د لوبې پر مهال چې د دریو ولسوالیو ګڼ شمېر خلک ورغلي ول یوه ځانمرګي برید کې تر ۵۰ ډېر کسان ووژل شول او لږ تر لږه ۶۵ ټپیان شول.
پر کال ۱۳۹۳ د چنګاښ پر ۲۵ د ارګون ولسوالۍ بازار کې په یوه موټر بم چاودنه کې له ۴۰ زيات کسان ووژل شول او تر ۴۰ ډېر ټپيان شول چې ډېری يې ښځې او ماشومان ول.
