تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
پکتیکا کې وسله والو ملا امام له خپلې مېرمنې سره وژلی
له جنوب ختیځ پکتیکا ولایته راپورونه وایي، د دغه ولایت په یوسف خېلو ولسوالۍ کې یو دیني عالم له خپلې مېرمنې سره یوځای د نامعلومو وسلوالو په برید کې وژل شوی دی.
د پکتیکا د امنیت امر عبدالرؤف مسعود بي بي سي ته وویل، یاد عالم د سیمې عادي او بېوزله وګړی و، چې د شپې لخوا وسلوال کور ته ورغلي، دی او مېرمن دواړه یې وژلي دي.
ښاغلی مسعود زیاتوي: "ملا امام ډېر بېوزله سړی و، له چا سره یې هېڅ ډول شخصي ستونزه نه لرله. زموږ څېړنې روانې دي، چې د دوی د وژل کېدو اصلي انګیزه پیداکړو، د دغه برید انګیزه څه وه او ولې ښځه او مېړه وژل شوي دي."
د سیمې اوسېدونکو ځینو رسنیو ته ویلي، وژل شوی ملا درې کاله وړاندې د سولې له بهیر سره یوځای شوی و، خو د امنیت امر بي بي سي ته وویل، دی په دې اړه هېڅ ډول معلومات نه لري.
امنیت امر له دې هم ناخبري وښوده، چې نوموړی دیني عالم د مرکز ښرنې د ملکي روغتون د جومات امام و.
تر اوسه کومې ډلې یا چا د یاد ملا او د هغه د مېرمنې د وژلو پړه نه ده منلې.
په ورته وخت کې د تېرې جمعې په ورځ د یوې مېرمنې جسد د خوست ولایت په یوه دښته کې ټوک ټوک موندلی شوی او د دغه ولایت ملکي روغتون ته د لا زیاتو څېړنو په موخه وړل شوی و.
