تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
کراچۍ کې افغان دیپلومات د خپل ساتونکي په ډزو وژل شوی
رپوټونه وايي، د پاکستان جنوبي کراچۍ ښار کې د افغانستان کونسلګرۍ د ننه یو افغان دیپلومات د یوه ساتونکي په ډزو وژل شوی دی.
سیمه ییزو رسنیو ویلي، په ډزو د کونسلګرۍ درېیم سکرتر وژل شوی دی.
بي بي سي ته یوې سرچینې ویلي، وژل شوی د کونسلګرۍ درېیم سکرتر محمد ذکي عبده نومېږي.
اسلام اباد کې د افغانستان سفارت په یوه خبرپاڼه کې د وژل شوي دیپلومات هویت نه دی ښودلی، خو وايي چې برید کوونکی خصوصي ساتونکی یو افغان دی.
اسلام اباد کې افغان سفیر عمر زاخېوال پر خپل فیسبوکپاڼې لیکلي: "نن ماسپښین۱۲:۳۰ بجې یوه افغان ساتونکي کراچۍ کې د افغان کونسلګرۍ د ننه ډزې کړې چې پایله کې یې زموږ یو دیپلومات وژل شوی دی".
تر اوسه د برید د انګیزې په اړه څه نه دي ویل شوي.
پولیسو د کلیفټون ولسوالۍ سیمه او د کونسلګرۍ شاوخوا سیمه کلابنده کړې ده.
یوه پولیس چارواکي رویټرز خبري اژانس ته ویلي، برید کوونکی ساتونکی نیول شوی دی.
په ۲۰۱۳ کال د بلوچستان ایالت مرکز کوښه کې د افغان کونسلګرۍ یو کارکوونکی محمد هاشم عبرت بې درکه شوی و.
په ۲۰۰۸ کال، پاکستان ته نومول شوی افغان سفیر عبدالخالق فراهي د ناڅرګندو وسله والو له خوا خیبر پښتونخوا تښتول شوی و، چې له دوو کلونو او دوو میاشتو بند وروسته خوشی شو.
