په افغانستان کې د طالبانو حکومت کليدي وزیرانو له مولوي هبت الله آخندزاده سره لیدلي
د طالبانو حکومت ویلي چې دغو چارواکو د یو شمېر ولایتونو له علماوو سره یو ځای په کندهار کې له خپل مشر سره ليدلي. د طالبانو د حکومت ویاند بي بي سي ته ویلي، دوی په خپلو کاري چارو کې مشورې ته کندهار کې خپل مشر ته ورغلي.
په دغو چارواکو کې د ملي دفاع، کورنیو چارو، بهرنیو چارو او مخابراتو او معلوماتي ټکنالوژۍ وزیران شامل دي. ځینو سرچينو کندهار ته د طالبانو د استخباراتو د مشر د تګ خبر هم ورکړی.
د طالبانو د حکومت د کابينې دغه غړي له هغو څېرو دي چې د خپلې مشرتابه د اوږدمهالو سیاستونو په اړه يې په غونډو کې په ډاګه نظرونه څرګند کړي او د نجونو د زده کړو په ملاتړ يې هم بیا بیا غږ پورته کړی.
د طالبانو د حکومت د کابينې هغه غړي چې هم کلیدي وزارتونه پر مخ وړي، هم د دغه خوځښت له مهمو سټو دي او هم يې په دې وروستیو کې د خپل نظام د لرلیدونو او په تېره بیا د ښځو د زده کړو په تړاو د لوړ غږ نظرونه لرلي وو د خپل مشر لیدو ته کندهار ورغلي.
که څه هم د طالبانو د حکومت وايي، دوی د يو شمېر ولایتونو له علماوو سره یو ځای د مشر لیدلو ته کندهار ته تللي. د طالبانو د حکومت اعلامیه وايي چې د یو شمېر ولایتونو له علماوو سره د ملي دفاع، کورنیو چارو، بهرنیو چارو او د مخابراتو او معلوماتي ټکنالوژۍ وزارتونو سرپرستانو هم د دوی له مشر هبت الله آخندزاده سره په غونډه کې ګډون کړی.
د طالبانو حکومت ويلي چې د طالبانو مشر دغه علما او مسؤلین خپلو مسؤلیتونو ته متوجه کړي، د ديني علم د ترویج په ګډون يې توصيې ورته کړې.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د طالبانو د حکومت مرکزي ویاند ذبيح الله مجاهد بي بي سي ته هم وویل چې د کابينې دغه غړي په خپلو کاري برخو کې مشورې غوښتلو ته ورغلي وو.
د طالبانو د حکومت د کابينې دغه مخکښ غړي داسې مهال کندهار کې د خپل مشر لیدلو ته له علماوو سره یو ځای ورځي چې د نوي ښوونیز کال په رارسېدو سره یو وار د افغانانو او نړیوالو سترګې دي چې دوی به په زده کړو کې د نجونو او ښځو له حضور سره څرنګه چلند کوي.
د طالبانو لوړو زدکړو وزارت همدا پرون بي بي سي ته ومنله چې د کابل په ګډون د سړو سیمو پوهنتونونه به د کب په ۱۵مه یوازې د هلکانو لپاره پیل شي او د ښځینه محصلینو په اړه د دوی د حکومت پرېکړې تغییر نه دی کړی.
د طالبانو حکومت د لوړو زدکړو وزارت د لیندۍ میاشتې په ۲۹ نېټه د یوه مکتوب په ترڅ کې ټولو دولتي او خصوصي پوهنتونو او د لوړو زدکړو موسسو کې د "نجونو تحصیل تر امر ثاني" پورې ځڼدولی وو چې د دوی د حکومت له پیل سره سم تر شپږمو ټولګیو پورته نجونو د زده کړو بندولو ته په کتو دې هم پرېکړې هم پراخ غبرګونونه را وپارول.
د عکس سرچینه، Talban
له دې امله په کور دننه او بهر د طالبانو پر حکومت هم بې شمېره او بې ځنډه نیوکې روانې دي. خو د طالبانو حکومت وايي دا پرېکړه ېې موقتي ده او مشرتابه يې بیاکتنه پرې کوي.
دغه وزیران له هغو څېرو هم دي چې د خپل نظام د پايښت او په رسميت پېژندلو اندېښنه هم لري چې اوس تر ډېره د نجونو په زده کړو هم تړلې.
ویل کېږي کندهار ته له کابله د طالبانو د حکومت په ورغلو دغو چارواکو کې د استخباراتو مشر عبدالحق وثیق هم دی. هغه او د کورنیو چارو او دفاع وزیران له هغو چارواکو هم دي چې کابل ته د پاکستان له یوه ورغلي لوړپوړي پوځي پلاوي سره یې کتلي وو.
دغه پلاوي چې د پاکستان د دفاع وزیر خواجه اصف په مشرۍ تېره 'چهارشنبه' کابل ته تللی وو د پاکستاني رسنیو په وینا د طالبانو د حکومت له چارواکو سره د ترهګرۍ پر ضد د مبارزې په اړه غږېدلي وو.
هغه مهال سرچينو ویلي وو چې کابل ته تلونکی پلاوی د افغانستان د طالبانو له مشر څخه د ترهګرۍ د مخنيوي په برخه کې مهم پیغامونه له ځان سره وړي. ښايي د هغو غوښتنو یوه يې د پاکستاني طالبانو د کنټرول هم وي.
