تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ګوتېرش له اوکرایین او روسیې د خوراکي توکو صادرېدو لپاره نړیواله همکاري وغوښته
د ملګرو ملتونو سرمنشي انتونیو ګوتېرش د دې ډاډمنېدو کې د نړیوالې همکارۍ غوښتنه کړې چې د روسیې خوراکي توکي او کیمیاوي سره او همدا راز د اوکرایین غلې دانې نړیوالو مارکېټونو ته ورسېږي.
ښاغلي ګوتېرش دا څرګندونې د ترکیې استانبول کې کړې دي.
ترکیه دمګړۍ د دې پر همغږۍ بوخته ده چې له اوکرایین د تورې بحېرې له لارې د غلو صادرات بېرته پیل شي.
د ملګرو ملتونو سرمنشي د انقرې دا هڅې بشریت لپاره مهمې بللې او ستایلې دي. خو ترڅنګ یې پر دې هم ټینګار کړی چې نړۍ کې د خوراکي توکو بیو ټیټېدو لپاره له روسیې هم د دغو توکو د صادراتو پیلېدل اړین دي.
ښاغلی ګوتېرش تر ترکیې وړاندې اوکرایین ته تللی او هلته یې د دغه هېواد اوترکیې له ولسمشرانو سره لیدلي و.
د ترکیې ولسمشر رجب طیب اردوغان هم پر اوکرایین د روسیې له یرغل را وروسته په لومړي ځل دغه هېواد ته تللی و.
ولودومیر زېلېنسکي له هغه او ښاغلي ګوتېرش سره له دغه هېواده د غلو دانو د صادراتو پر بیا پیلېدو خبرې وکړې.
روسیې دې ته غاړه ایښې چې د اوکرایین له بندرونو د ترکیې او ملګرو ملتونو تر څارنې لاندې د غلو صادراتو بیا پیلېدو ته اجازه ورکړي.
اوکرایین د نړۍ په کچه د غلو دانو ستر صادرونکی دی، خو د روسیې د یرغل له کبله یې دا صادرات ټکني شوي دي.
له اوکرایینه د غلو د صادراتو درېدو د نړۍ لروبر د خوراکي توکو کمښت او لوږې سره د میلیونونو کسانو د مخامخېدو خطر پېښ کړی.
له اوکرایین د غنمو صادراتو درېدو له کبله نړۍ کې د خوراکي توکو بیې هم پام وړ لوړې شوې.
