تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د کولمبیا زندان کې شخړه او مرګونې اورلګېدنه؛ ۴۹ بندیان وژل شوي
د کولمبیا سویل لوېدیځ کې د 'والې دېل کاوکا' سیمې په یوه زندان کې د بندیانو او ساتونکو ترمنځ د شخړې پر مهال اور لګېدلی چې لږترلږه ۴۹ بندیان پکې وژل شوي.
دې پېښه کې د ساتونکو په ګډون ۳۰ کسان ټپي شوي هم دي.
چارواکو ویلي دا اور پخپله بندیانو لګولی و چې د ساتونکو مخه پرې ونیسي.
دا پېښه تولوا نومي زندان کې شوې.
چارواکي وايي اور وروسته کنټرول شوی او یو بندي هم نه دی تښتېدلی.
اور د زندان هغه بلاک کې لګول شوی چې ویل کېږي شاوخوا ۱۸۰ بندیان پکې ساتل کېدل.
کولمبیا کې د زندانونو د دولتي ادارې مشر جنرال تیتو کاستېلانوس ویلي ځینې بندیانو پرته له دې چې پایله یې وسنجوي، خپلو توشکو ته اور ورته کړی.
د نوموړي په وینا دا ور ډېر ژره د بلاک نورو برخو ته هم خپور شو.
چارواکي وايي د پېښې ځینې ټپیان روغتون ته لېږدول شوي.
ښاغلی تیټو زیاتوي "ساتونکو د اور وژنې وسایلو په کارولو سره ډیری بندیان وژغورل، خو په خواشینې سره پایله کې ۴۹ بندیان مړه او ۳۰ ټپیان شول."
د کولمبیا ولسمشر اېوان ډوکو د قربانیانو کورنیو سره پر دې پېښه خواشینې ښودلې.
هغه ویلي "د دې ناوړه وضعیت د توضیح لپاره مې د بېړنیو څېړنو لارښوونه کړې ده."
کولمبیا کې د سرڅېړونکي دفتر چې د څېړنو عامه اداره ده، وايي دوی تولوا ته ځانګړی کمېسیون استوي.
د لاتینې امریکا د ځینو نورو هېوادونو په څېر کولمبیا کې هم زندانونه په بندیانو ډک دي.
د دغه هېواد ټولو ۱۳۲ زندانونو کې ۸۰ زره بندیانو ته ځای پام کې نیول شوی، خو اوسمهال پکې له ۱۱۲ زرو ډېر کسان ساتل کېږي.
