ځلا ځاځۍ؛ د یوې ځوانې چارواکې ګومارنې ته بېلابېل غبرګونونه
ځلا ځاځۍ د خوست امنیه قوماندانۍ د جنایي جرمونو اداره کې تازه دنده پیل کړې. نوموړې د افغان پولیسو لومړنۍ ښځینه کارکوونکې نه ده، خو پر خواله رسنیو د هغې د ټاکل کېدو په اړه بیلابیل غبرګونونه ښودل شوي.
اغلې ځاځۍ پرون یکشنبه ( د جون ۷ ) د خوست د پولیسو د جنايي جرمونو ضد څانګې د دفتر د آمرې په توګه پر دنده پیل وکړ.
د خواله رسنیو ځینو کاروونکو د اغلې ځاځۍ د ګومارل کېدو ستاینه کړې، خو ځینو نورو بیا پرې نیوکې کړې دي او پر دې دنده یې د هغې ګومارل سمه پریکړه نه ده بللې. له همدې کبله پر خواله رسنیو د دې ګومارنې د پلویانو او مخالفینو ترمنځ خورا تود بحث پیل شوی.
ایاز خان پر خپله فیسبوک پاڼه د یوې نجلۍ انځور چې وايي د ځلا ځاځۍ دی خپور او ویلي یې دي چې په فیسبوک کې د خپل انځور پر ځای د هغې د انځور په خپرولو ویاړي.
د افغانستان ملاتړي په نوم فیسبوک پاڼه کې پر هغو کسانو نیوکه شوې چې د اغلې ځلا له ګومارنې سره یې مخالفت ښودلې او ان هغوی ته یې بد رد ویلي.
دې پاڼه کې په ځانګړې توګه د لوستو کسانو د نیوکو په ځواب کې د پيغور په بڼه ویل شوي چې په افغانستان کې د نورو قومونو مېرمنې چې په دولتي ادارو کې کار کوي هڅول کیږي. خو ان لوستو کسانو ځلا ځاځۍ پسې سپکې سپورې ویلې دي.
اکرام ماموند د اسلام په لومړنیو کلونو کې د ځینو مخکښو مېرمنو نومونه یاد کړي او د اغلې ځاځۍ د ګومارنې مخالفینو ته یې په ځواب کې ویلي چې : "ښځه انسان دی او د انساني کرامت درناوی یي، زمونږ دیني، فرهنګي او پښتني مسولیت او مکلفیت دی ".
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
زینت افغان پر ټویټر د ځلا ځاځۍ انځور خپور کړی او له هغې یې مننه کړې چې په داسې یوه ټولنه کې یې دومره دروند مسؤلیت پر اوږو اخستی چې د دې په وینا نارینه په کې واکمن دي.
زاهد خان اختر پر ټویتر غوښتنه کړې چې افغان مېرمنې باید بې جراته نه کړل شي او ملاتړ دې یې وشي. د ده له نظره پر عامه دندو د مېرمنو د ګومارنې په وړاندې یوازینی خنډ نرواکي ده.
محمد ابراهیم ماموند لیکلي: "افرين. ښځې ددې ملت نيم وجود دی او که نيم وجود فلج کړې نو وجود ژوندی نه پاتې کيږي ".
د مخالفینو نظرونه څه دي؟
خو مسعود وردګ د اغلې ځلا له ګومارنې سره په دې دلیل مخالف دی چې وايي میرمنې د طبیعت له پلوه مهربانه دي نو ځکه نه شي کولی چې داسې یوه دنده پرمخ بوځي چې د جزا او مجازاتو اړوند وي.
یو شمیر نورو پر اغلې ځاځۍ نیوکې کړې او لکه د مسعود وردګ په څېر یې دا ټاکنه پر ځای نه ده بللې. ځینو نورو د هغې پر شخصي حریم تیری کړی او ځینو بیا د هغې جامو ته ګوته نیولې ده.
حیران الله حیران لیکلي ځلا د اروپايي فرهنګ تر اغیز لاندې راغلې.
د اغلې ځاځۍ ګومارلو ته په غبرګون کې د فیسبوک او نورو خواله رسنیو ښځینه کاروونکو د حکومت د دې ګام هرکلی کړی او دا یې هڅولې ده. په نارینه و کې یې هم د مخالفینو شمیر کم دی.
که څه هم د ځلا ځاځۍ پر ګومارلو ګڼ شمېر کسانو منفي غبرګون ښودلی خو ظاهرا داسې ښکاري چې لږ تر لږه پر خواله رسنیو د مخالفینو پر تله د ملاتړو شمېر زیات دی..
