تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
په زندان کې د ولسمشر حسن روحاني د ورور لومړۍ ورځ
د ایران د ولسمشر حسن روحاني ورور د فساد په یوه قضیه کې له تورنېدو وروسته نن چارشنبه زندان ته ولېږل شو. نوموړی په دې قضیه کې په پنځه کاله بند محکوم شوی.
حسین فریدون د خپل ورور او ولسمشر حسن روحاني نږدې سلاکار و. د نوموړي مدافع وکیلانو نن چارشنبه رسنیو ته وویل چې موکل یې د تهران په ایوین زندان کې خپله پنځه کلنه د بند سزا پیل کړه.
پر حسین فریدون تور و چې بډې یې اخیستې دي، او تېره می میاشت کې په اووه کاله بند محکوم شو. خو وروسته د استیناف محکمې د هغه د بند موده پنځو کالو ته راکمه کړه.
خو د بند د سزا ترڅنګ نوموړی شاوخوا ۹ میلیونه ډالره جریمه شو او امر ورته وشو چې په ناقانونه توګه ترلاسه کړې ټولې شتمنۍ بېرته وسپاري.
پخپله ښاغلي فریدون پر ځان لګېدلي تورونه رد کړي، او د ولسمشر حسن روحاني ځینې پلویان هم ادعا کوي چې په قضایي برخه کې ځینې سخت دریځۍ کړۍ غواړي له دې لارې پخپله د ولسمشر روحاني اعتبار خراب کړي.
خو محکمې ویلي، دوی په خپلو پرېکړو کې هېڅ ډول سیاسي مصلحتونو ته نه ګوري.
ولسمشر حسن روحاني د ۲۰۱۳ او ۲۰۱۷ کال په ټاکنیزو کمپاینونو کې ژمنه کړې وه چې فساد به ختموي، خو تر دې دمه په دې مبارزه کې پاتې راغلی.
