تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
"امریکا ضد پارونې د پاکستان په زیان دي"
- Author, سمیع الله موسیزی
- دنده, بي بي سي/ لندن
پاکستانۍ ډان ورځپاڼه
پاکستانۍ ورځپاڼې ډان خپله سرمقاله د پاکستان او امریکا اړیکو ته ځانګړې کړې ده او زیاتوي چې د امریکا له سفیر سره د پاکستان د ملي امنیت سلاکار لیدنه یو ښه فرصت و چې پاکستان له امریکې سره د افغانستان د سولې په بهیر کې د ملاتړ ډاډ ورکړ.
ورځپاڼه زیاتوي چې وضعیت داسې ښکاري چې پاکستان یو ځل بیا د امریکا پر ضد خلک پاروي او دا به ښې پایلي ونه لري.
ډان لیکي په افغانستان کې د پاکستان امنیتي اندېښنې پر ځای دي، په تېره د هند فعالیت ته په کتو او بله دا چې بې ثباته افغانستان د پاکستان لپاره خطر دی.
ډان وايي، که د افغانستان په اړه څلور اړخیزه او د شپږ جمع یو هېوادونو لیده کاته بیا پيل شي، ديپلوماتیکو هلو ځلو ته به لاره هواره شي.
انډین ایکسپریس ورځپاڼه
انډین ایکسپریس ورځپاڼه بیا د افغانستان او پاکستان ترمنځ د لانجې پراخېدو ته اندېښنه ښودلې ده.
د دې ورځپاڼې په یوه مطلب کې ویل شوي چې د اسلامي دولت نومې ډلې له لاسه د عراق د موصل او د سوریې د رقې ښار په وتلو سره ښايي د دغې ډلې وسله والو دې سیمې ته مخه کړي او په سیمه کې لانجې دهغوی د فعالیت زمینه برابروي.
پاکستانۍ ایکسپریس ورځپاڼه
پاکستانۍ ورځپاڼه ایکسپریس ټربیون ادعا کوي چې د افغان ولسمشر هغه څرګندونې چې د اختر په ورځ ېې وکړې او له پاکستانه یې وغوښتل له افغانستان سره د خبرو میز ته کښېنې د افغان ولسمشر په دریځ کې بدلون ښيي او دا دریځ د امریکا له ملاتړه برخمن دی.
ورځپاڼه زیاتوي چې د افغان ولسمشر له دغو څرګندونو وروسته به د څلور اړخیزه ډلې غونډه وشي او په دې اړه به خبرې وشي چې څنګه کېدای شي طالبان د سولې خبرو ته وهڅول شي. افغانستان، پاکستان، امریکا او چین د څلور اړخیزه ډلې غړي هېوادونه دي.
برتانوۍ ابزرور اونیزه
بریتانوۍ ابزرور اونیزې بنګله دیش ته د روهینجا مسلمانانو د ورتګ په اړه یوه ځانګړي راپور کې د عیني شاهدانو له قوله لیکلي چې د میانمار ځواکونو د مسلمانانو کلي سوځولي او ملکي وګړي يي په بې توپيره ډول وژلي دي.
دغه راز ورځپاڼې د مرستندویه ټولنو د کارکوونکو له قوله ویلي چې په تیرو ۲۴ ساعتونو کې په میانمار کې د مېشتو مسلمانانو ۱۰ سلنه بنګلادیش ته اوښتي او د اوښتو کسانو شمېر شاوخوا ۷۰ زرو ته رسېږي.
د سعودي عکاظ ورځپاڼه
د سعودي عکاظ ورځپاڼه لیکي چې د دغه هېواد وليعهد محمد بن سلمان امر کړی چې د ده په لګښت دې د سعودي او جاپان ترمنځ د فوټبال سیالي ټول ټکټونه واخیستل شي او د فوټبال مینه وال کولای شي چې د ټکټ له پېرلو پرته د سیالي لیدلو ته ورشي.
