اسلام اباد پاکستان ته د امریکا د ځانګړې استازې تګ وځنډاوه

نیویارک ټایمز:

نیویارک ټایمز ورځپاڼه لیکي، پاکستان د ولسمشر ډونلډ ټرمپ پر هغو څرګندونو ناخوښ دی چې څو ورځې وړاندې نوموړي د ترهګرۍ پر ضد په روانه جګړه کې د پاکستان د رول په اړه کرې وې.

له دې همدې کبله پاکستاني حکومت اوس اسلام اباد ته د امریکا د بهرنیو چارو د مرستیالې وزیرې ورتګ ځنډولی.

ټاکل شوې ده چې الېس وېلز، چې د سویلي اسیا لپاره د امریکا د بهرنیو چارو مرستیاله وزیره ده، نن دوشنبه اسلام اباد ته سفر وکړي.

نیویارک ټایمز لیکي چې دا به د ولسمشر ټرمپ په واکمنۍ کې پاکستان ته د یوې جګپوړي امریایي چاراکې لومړنی سفر و، چې اوس وځنډېد.

د ورځپاڼې په وینا، په اسلام اباد کې د امریکا سفارت رویټرز خبري اژانس ته ویلي چې وروسته به دواړه هېوادونو په ګډه د دې سفر لپاره یوه بله نېټه وټاکي.

د پاکستان د بهرنیو چارو وزارت هم په دې اړه اعلامیه خپره کړې. دواړه خواو د سفر د ځنډېدلو لامل نه دی په ګوته کړی خو نیویارک ټایمز په اسلام اباد کې د امریکایي دېپلوماتانو له قوله لیکي چې د ولسمشر ټرمپ تر وینا وروسته دوی تمه درلوده چې پاکستان په یو نه یو ډول غبرګون ښیي.

ایکسپرېس ټریبیون:

د پاکستان ایکسپرېس ټریبیون ورځپاڼې د مشال خان په نامه د هغه محصل له پلار سره مرکه کړې چې په اپرېل میاشت کې د مردان په یوه پوهنتون کې د نورو محصلانو لخوا، دین ته د سپکاوي په تور ووژل شو.

اقبال خان په دې مرکه کې ایکسپرېس ټريبیون ته ګېله کړې چې د زوی د قتل قضیه یې په محکمه کې ډېره ورو پر مخ ځي او باید تر دې دمه کوم مهم پرمختګ پکې شوی وای.

دی زیاتوي چې سیمه ییز حکومت د ده د کورنۍ او د وژل شوي مشال خان د قبر د امنیت ساتلو لپاره امنیتي کسان ګومارلي دي.

خو دی په دې اندښمن دی چې ځیني سیمه ییز ملکان او سیاستوال پر ده فشار راوړي او ورنه غوښتنه کوي چې د قاتلینو له کورنیو سره دې یو جوړجاړي ته ورسېږي.

اقبال خان وایي، د خپلو زوی له قاتلینو سره هېڅ ډول جوړجاړی نه کوي، ځکه دا کار به په راتلونکي کې د همداسې یوې بلې پېښې لامل شي.

د مشال خان د قتل قضیه اوس د ترهګرۍ ضد یوې ځانګړې محکمې ته استول شوې ده خو اقبال خان په دې خپه دی چې دې محکمې د راتلونکې ناستې لپاره تر اوسه کومه نېټه هم نه ده اعلان کړې.