सल्यान बस दुर्घटनाः मृतकको सङ्ख्या १२ पुग्यो, ८ गम्भीर घाइतेलाई हेलिकप्टरबाट नेपालगन्ज लगियो

पश्चिम नेपालको सल्यान जिल्लाबाट दाङको तुलसीपुरतिर जाँदै गरेको एउटा यात्रुवाहक बस सडकबाट तल खस्दा कम्तीमा १२ जनाको मृत्यु भएको जिल्ला प्रशासन कार्यालय सल्यानले जनाएको छ।

उक्त बसमा झन्डै ३० जना यात्रु सवार रहेको बुझिएको अधिकारीहरूको भनाइ छ। मृत्यु हुनेहरूमध्ये १० जनाको सनाखत भएको प्रमुख जिल्ला अधिकारी लक्ष्मीदेवी होमागाईँ खतिवडाले बीबीसीलाई बताएकी छन्।

गम्भीर घाइते भएका आठ जनालाई हेलिकप्टरबाट नेपालगन्ज पठाइएको उनले बताइन्। घाइतेमध्ये धेरै जनालाई मेरुदण्डमा चोट पुगेको बताइएका छ।

यसअघि उनले उद्धारकार्यमा संलग्न टोलीलाई उद्धृत गर्दै अधिकारीहरूले "धेरै घाइतेहरू गम्भीर अवस्थामा" रहेको बताएकी थिइन्।

अरू घाइतेलाई एम्बुलेन्सबाट जिल्ला अस्पताल वा नेपालगन्जको कोहलपुरस्थित अस्पतालतिर पठाइएको जानकारी उनले दिइन्।

प्रमुख जिल्ला अधिकारीका अनुसार दुर्घटना जिल्लाको कपुरकोटमा भएको हो। दुर्घटनास्थल जिल्ला सदरमुकाम खलङ्गाबाट झन्डै ३५ किलोमिटर दक्षिणपूर्वमा छ।

राष्ट्रिय समाचार समितिका अनुसार मृतकमध्ये दुई जना बालबालिका पनि छन्।

जिल्ला प्रहरी कार्यालयलाई उद्धृत गर्दै राष्ट्रिय समाचार समितिले छ जनाको दुर्घटनास्थलमै मृत्यु भएको जनाएको छ।

कसरी भयो दुर्घटना?

प्रहरीको प्रारम्भिक अनुसन्धानमा तीव्र गतिमा गुडेको बसले अर्को सवारीसाधनलाई उछिन्न खोज्दा दुर्घटना भएको देखिएको प्रमुख जिल्ला अधिकारीले बताइन्।

भर्खरै विस्तार गरिएको सडकबाट बस झन्डै २०० मिटर तल खसेको थियो।

"त्यो खासै दुर्घटना हुने ठाउँ चाहिँ हैन रहेछ," उनले भनिन्, "ओभरटेक गर्दा भएको भन्ने छ।"

आइतवार अपराह्न बीबीसीसँग कुरा गर्दै उनले भनेकी थिइन्,"हामी अस्पतालमै छौँ। धेरै जना घाइतेहरू हुनुहुन्छ। यहाँ उपचार सम्भव नभएकाले हेलिकप्टरबाट अन्यत्रै लानुपर्ने अवस्था छ।"

उनका अनुसार हाल सिकिस्त अवस्थामा रहेका घाइतेहरूलाई नेपालगन्ज मेडिकल कलेज शिक्षण अस्पताल लगिएको छ।

"नेपाली सेनाको हेलिकप्टरमार्फत घाइतेहरूको उद्धार गरिएको हो," उनले जानकारी दिइन्।

दशैँको बेला एउटा यात्रुवाहक बस मुगु जिल्लाको राराछायानाथ नगरपालिका-७ मा दुर्घटनामा पर्दा कम्तीमा ३२ जनाको मृत्यु भएको थियो।

नेपालका पहाडी मार्गहरूमा प्रत्येक वर्ष चाडवाडका बेला ठूला दुर्घटनामा परेर धेरै मानिसले ज्यान गुमाउने गरेका छन्।

तथ्याङ्कमा सडक दुर्घटना