Rannsachadh às dèidh mar a chaidh bàthach aig seann taigh Jimmy Savile na theine

Chaidh sgrios a dhèanamh air bàthach aig seann taigh Jimmy Saville ann an Gleann Comhann feasgar Disathairne agus e air a dhol na theine.

Chaidh seirbheisean èiginn a ghairm mu 17:40 agus bha 3 einnseanan smàlaidh an làthair.

Tha an togalach ri taobh an A82 agus b'fheudar an rathad a dhùnadh eadar Taigh an Droma agus Baile a' Chaolais fad na oidhche.

Chaidh fhosgladh a-rithist madainn Didòmhnaich.

B' ann le Savile a bha an taigh aig Allt Na Reigh airson 13 bliadhna.

Chaidh milleadh a dhèanamh air an taigh fhèin grunn thursan às dèidh dha tighinn am follais às dèidh a' bhàis, an eùcoir a bha Savile ris.

Bha am preasantair telebhisean air fear de na h-eùcoirich feise as miosa san Rìoghachd Aonaichte riamh.

Chaidh cead dealbhachaidh a thoirt dhan neach aig a bheil an làrach an dràsta, an t-seann taigh a leigeal agus taigh ùr a chur na àite.

Am-measg a chead sin thèid urram a shealltainn dhan an t-sreapadair Dtr Hamish MacAonghais aig an robh an taigh aig aon àm.

Bhàsaich an Dtr MacAonghais ann a 2020 's bha esan ainmeal mar fhear a chruthaich làmhagan airson deigh, agus chruthaich e cuideachd streadsair a bhitheas luchd-teasargainn nam beann air feadh an t-saoghail a' cleachdadh.