Mòd Loch Abar 2025 am fear a bu shoirbheachaile ann an sia bliadhna

Boireannach agus bò mhòr mholach fhuadain aig a' Mhòd ann an Loch Abar 2025

Bha còrr math agus 9,000 duine aig farpaisean agus tachartasan iomall a' Mhòid

Chuir am Mòd Nàiseanta Rìoghail ann an Loch Abar an-uiridh £3.9m ris an eaconomaidh ionadail a rèir aithisg a chaidh fhoillseachadh Diluain.

Tha an Comunn Gàidhealach a bhios a' cur air dòigh prìomh fhèis Ghàidhlig na h-Alba ag ràdh gur e seo am Mòd a bu shoirbheachaile airson sia bliadhna.

Fhuair an rannsachadh a dh'iarr iad gun deach còrr is 9,400 ann - àrdachadh 4% an taca ri Mòd 2024 san Òban.

Thuirt Àrd-oifigear a' Chomuinn Ghàidhealaich, Peigi NicIllinnein, gun "do chùm Loch Abar tachartas air leth aig an robh buannachdan nach beag do ghnìomhachasan ionadail agus don fheadhainn a bha an làthair".

Tha an Comunn ag ràdh gun do dhearbh an suirbhidh cho cudromach 's a tha am Mòd ann a bhith a' cur air adhart na Gàidhlig a tha a-nis na cànan oifigeil an Alba.

Am measg nam freagairtean a bh' ann:

  • 83% le beachd nas làidire mu luach na Gàidhlig às dèidh a' Mhòid

  • 74% air am brosnachadh a dhol gu tachartasan Gàidhlig nas trice

  • 71% le spionnadh às ùr piseach a thoirt air an cuid Ghàidhlig

  • 70% a thuirt gun robh iad airson a' Ghàidhlig a chleachdadh nas trice

Thuirt Ceannard Comhairle na Gàidhealtachd, Raymond Bremner: "Ged nach eil am mòd ann ach airson beagan is seachdain, tha dìleab nan tachartasan a' maireachdainn bliadhnaichean.

"Tha e a' dèanamh airgid do ghnìomhachasan ionadail, agus tha e a' brosnachadh dhaoine an cuid sgilean Gàidhlig a leasachadh agus a chleachdadh."

Leum seachad air gailearaidh dhealbhan
  1. An fheadhainn a bhuannaich Buinn Òir a' Chomuinn Ghàidhealaich aig Mòd 2026
    AN COMUNN GÀIDHEALACH

    Donnchadh MacLeòid agus Màiri Callan a bhuannaich Buinn Òir a' Chomuinn Ghàidhealaich sa Ghearasdan

B' e an naoidheamh turas a chaidh am Mòd a chumail ann an Loch Abar, agus thuirt 91% de na fhreagair an t-suirbhidh gur e An Gearasdan àite fìor mhath air a shon.

Airson an treas bliadhna ann an sreath, chaidh na chuir a-steach airson nam farpaisean an-àirde le 1,900 farpaiseach.

Bidh Mòd 2026 a' tilleadh a Glaschu eadar an 9mh agus 17mh den Dàmhair.

'S ann an Glaschu a tha an àireamh as motha de luchd-labhairt na Gàidhlig taobh a-muigh nan Eilean Siar.

Thuirt Peigi NicIllinnein: "Tha am Mòd air a dhol bho neart gu neart sna beagan bhliadhnaichean a chaidh seachad agus tha sinn a' dèanamh fiughair gus togail air an t-soirbheas sin ann an Glàschu."