Là mòr na Gàidhlig an Cataibh

Tha feadhainn a tha a' feuchainn ri suidheachadh na Gàidhlig ann an Cataibh a leasachadh ag ràdh gu bheil iad nas misneachaile na bha iad agus là sònraichte gu bhith aca air an deireadh-sheachdain.

Thòisich deasbad às ùr mu chor a' chànain ann an Cataibh is àireamhan a' chunntais-shluaigh ann an 2022 air dealbh gu math dubhach a dhèanamh.

'S e gu ìre mhòir aithris a rinn am fear-naidheachd Alasdair MacLeòid air BBC Naidheachdan a phiobrach an deasbad an toiseach.

Chuala Alasdair mar a bha an cànan air crìonadh gu mòr thar nam bliadhnaichean is gur e glè bheag a bha a-nise a' tachairt a thaobh a' chànain.

Air a' cheann thall chaidh an iomairt Gàidhlig ann an Cataibh a stèidheachadh is iad air a bhith ag obair bhon uairsin feuch gnothaichean a thoirt air adhart.

Disathairne bidh là Gàidhlig sònraichte aca ann an Talla na Luirge.

"Tha rudan air tighinn air adhart beagan is tha sinn a' feuchainn dìreach ri tachartasan is rudan mar sin a chur air dòigh san sgìre 'son Gàidhlig a bhrosnachadh," thuirt Kirsty NicConail a tha an sàs san iomairt.

"Tha sinn airson barrachd fiosrachaidh fhaighinn a-mach gu daoine aig nach eil Gàidhlig gu bheil na cothroman seo ann is 's e Là na Gàidhlig dòigh eile air sin a dhèanamh".

Tha farsaingeachd mhòr de rudan a' dol tron là do dhaoine aig diofar aoisean, bùithtean-obrach Leughadh is Seinn is Cur Air Dòigh Fhlùraichean is Tai Chi sa Ghàidhlig nam measg.

Thig gnothaichean gu ceann air an oidhche le cuirm-chiùil is cuid de shàr cheòlaidearan na sgìre gu bhith a' nochdadh.

Tha an luchd-iomairt ag aithneachadh gu bheil slighe fhada romhpa ach tha iad an dòchas gur e ceum cudromach eile a bhios san là seo air an rathad.

"Tha sinn an dòchas Gàidhlig a bhrosnachadh is ùidh a thogail sa Ghàidhlig agus rudan eile a dhèanamh, 's dòcha tro na sgoiltean," thuirt Kirsty.

"Tha sinn an dòchas gum bi là eile mar seo againn cuideachd".

Gheibhear barrachd fiosrachaidh mu Là Gàidhlig Chataibh an seo, taobh a-muigh.