कोरोना: मास्क खाली करून खोकणाऱ्याला अटक, 22 जणांना संसर्ग केल्याचा आरोप

22 लोकांना कोरोनाचा संसर्ग केल्याच्या संशयावरून स्पेनमध्ये एका व्यक्तीला अटक करण्यात आली आहे.

40 वर्षांची ही व्यक्ती खोकला आणि 40 सेल्सिअसपेक्षा जास्त ताप असूनही कामावर गेली. तसंच ही व्यक्ती जिममध्येही जात होती, असा आरोप करण्यात आला आहे.

ही व्यक्ती माजोर्का येथील आपल्या कामाच्या ठिकाणी फिरली होती. तसंच मास्क खाली करून खोकली आणि सहकाऱ्यांना सांगितलं की मी त्यांना संक्रमित करणार आहे.

काम करण्याच्या ठिकाणावरील पाच सहकारी आणि जिममधील तीन जणांना आता कोरोनाची लागण झाली आहे.

आणखी 14 जणांचाही यात समावेश आहे. यामध्ये रुग्णांच्या कुटुंबीयांनाही कोरोनाची लागण झाल्याचं समोर आलं आहे. यात तीन वर्षांचा मुलाचाही समावेश आहे.

24 एप्रिल रोजी स्पॅनिश पोलिसांनी सांगितलं की, या व्यक्तीमध्ये अनेक दिवसांपासून कोरोनाची लक्षणं होती. पण त्याने कामाच्या ठिकाणाहून घरी जाण्यास नकार दिला होता.

कोरोनाची टेस्ट केल्यानंतरही तो कामावर आणि जिममध्ये गेला. तोपर्यंत टेस्टचा रिपोर्ट आला नव्हता.

सहकाऱ्यांनी त्यांना घरी परतण्यास सांगितलं पण त्यांने तेव्हाही नकार दिला असंही पोलिसांनी सांगितलं. यावेळी त्याने तोंडावरील मास्क खाली केले, तो खोकला आणि म्हणाला, "मी तुम्हाला सगळ्यांना कोरोनाचा संसर्ग करणार आहे."

त्याची कोरोना टेस्ट पॉझिटिव्ह आल्यानंतर सहकारी सतर्क झाले असं पोलीस सांगतात. जानेवारी महिन्यापाससून पोलीस या घटनेचा तपास करत आहेत. कोणीही गंभीर आजारी नसल्याचंही पोलिसांनी स्पष्ट केलं.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)