विधान परिषदेसाठी मतदान संपन्न, भाजप की महाविकास आघाडी.. कोण बाजी मारणार?

विधान परिषद निवडणुकीसाठी 10 डिसेंबरला मतदान झालं. बिनविरोध निवडणूक वगळता, जिथं मतदान पार पडणार आहे, तिथं ही निवडणूक भाजप विरुद्ध महाविकास आघाडी अशीच होणार असल्याचं चित्र आहे. त्यामुळे संपूर्ण राज्याचं या निवडणुकीकडे लक्ष लागलं आहे.

विधानपरिषदेच्या एकूण 6 जागांवर निवडणुका आयोगानं जाहीर केल्या होत्या. त्यातील मुंबईतल्या दोन जागा, कोल्हापूर आणि धुळे-नंदुरबार या चार जागांवर बिनविरोध निवडणुका झाल्या, तर अकोला-वाशिम बुलडाणा आणि नागपूरमध्ये मतदान झालं.

अकोला-वाशिम-बुलडाण्यात शिवसेनेचे गोपिकिशन बाजोरिया विरूद्ध भाजपचे वसंत खंडेलवाल असा सामना रंगणार आहे, तर नागपुरात भाजपकडून चंद्रशेखर बावनकुळे निवडणुकीसाठी उभे आहेत.

वाशिम - बुलढाणा - अकोला हा शिवसेनेचा बालेकिल्ला समजला जातो. शिवसेनेचे गोपीकिशन बाजोरिया हे सलग तीन वेळा म्हणजे 2004 पासून स्थानिक स्वराज्य संस्था निवडणुकीतून विधानपरिषदेवर निवडून गेले आहेत. चौथ्यांदाही गोपीकिशन बाजोरिया यांना शिवसेनेकडून उमेदवारी देण्यात आली आहे. तर भाजपकडून वसंत खंडेलवाल यांना उमेदवारी देण्यात आली आहे.

वसंत खंडेलवाल हे नितीन गडकरी समर्थक आहेत. भाजपसमोर शिवसेनेचा हा बालेकिल्ला भेदण्याचं मोठं आव्हान आहे.

तर नागपुरात काँग्रेसकडून मात्र उमेदवारीचा गोंधळ पाहायला मिळाला.

काँग्रेसनं काल (9 डिसेंबर) अचानक उमेदवार बदलला. आधी छोटू भोयर यांना उमेदवारी दिली होती. मात्र, ती उमेदवारी मागे घेत, अपक्ष उमेदवार मंगेश देशमुख यांना काँग्रेसनं पाठिंबा दिला आहे.

कोल्हापूरमध्ये सतेज पाटील बिनविरोध

विधान परिषदेच्या कोल्हापूरमधील जागेवरून काँग्रेसचे नेते आणि राज्याचे गृहराज्यमंत्री सतेज पाटील हे बिनविरोध निवडून येण्याचा मार्ग मोकळा झाला आहे. कारण भाजपचे उमेदवार अमल महाडिक यांनी शेवटच्या दिवशी उमेदवारी अर्ज मागे घेतला आहे.

अमल महाडिक यांनी या निवडणुकीतून माघार घेतल्यानं कोल्हापुरात रंगू पाहणारा 'पाटील विरुद्ध महाडिक' गटातील सामना तूर्तास टळला आहे.

दुसरीकडे, मुंबईतील विधान परिषदेच्या दोन जागाही बिनविरोध झाल्यात. मुंबईत काँग्रेसच्या पाठिंब्यावर अपक्ष म्हणून अर्ज दाखल केलेल्या सुरेश कोपरकरांनी माघार घेतली आहे. त्यामुळे भाजपचे राजहंस सिंग आणि शिवसेनेचे सुनील शिंदे हे बिनविरोध विधान परिषदेत जातील.

विधानपरिषदेच्या सहा जागांसाठी येत्या 10 डिसेंबरला (शुक्रवारी) निवडणूक होत आहे. मुंबईच्या दोन, धुळे-नंदुरबार, वाशिम - बुलढाणा - अकोला, कोल्हापूर आणि नागपूर या ठिकाणच्या स्थानिक स्वराज्य संस्थांमधून होणारी ही निवडणूक आहे.

14 डिसेंबरला या निवडणुकीची मतमोजणी होणार आहे. महाविकास आघाडी विरूद्ध भाजपच्या या लढ्यात काही ठिकाणी राजकीय दृष्ट्या नवे चेहरे समोर आले तर काही ठिकाणच्या दिग्गजांना डच्चू देण्यात आला आहे. या लढती कोणाच्या आहेत? त्यामागच्या राजकीय घडामोडी काय आहेत? यासंदर्भातला हा आढावा...

कोणाचा कार्यकाळ संपणार?

मुंबईमधल्या 2 जागांची मुदत संपत आहे. शिवसेनेचे माजी मंत्री रामदास कदम आणि कॉंग्रेसचे मुंबई अध्यक्ष भाई जगताप यांच्या जागांचा कार्यकाळ संपत आहे.

अकोला - बुलढाणा - वाशिममधून शिवसेनेच्या गोपीकिशन बाजोरिया यांचा कार्यकाळ संपणार आहे. नागपूरमधून भाजपचे गिरीश व्यास यांचा कार्यकाळ संपणार आहे.

धुळे-नंदुरबारमधल्या भाजपच्या अमरिश पटेल यांचा कार्यकाळ संपत आहे.

कोल्हापूरमधले कॉंग्रेसचे नेते आणि गृहराज्यमंत्री सतेज पाटील यांचा कार्यकाळ संपत आहे.

मुंबईत दोन्ही 'भाई' मैदानाबाहेर?

मुंबईतल्या दोन जागांसाठी शिवसेनेकडून माजी मंत्री रामदास कदम यांना डच्चू देऊन सुनील शिंदे यांना उमेदवारी देण्यात आली आहे. रामदास कदम यांना उद्धव ठाकरे यांच्या कॅबिनेटमध्ये स्थान मिळालं नसल्यामुळे ते नाराज असल्याची चर्चा होती.

त्याचबरोबर काही दिवसांपूर्वी अनिल परब यांच्या विरोधातील काही रसद रामदास कदम यांनी भाजपचे नेते किरीट सोमय्या यांना पुरवल्याचे आरोप झाले.

त्यासंदर्भातल्या ऑडियो क्लिपस् ही व्हायरल झाल्या होत्या. त्यामुळे मुख्यमंत्री उद्धव ठाकरे हे नाराज असल्याचंही बोललं जात होतं. हेच प्रकरण रामदास कदम यांना भोवलं असून यामुळे कदमांना उमेदवारी नाकारल्याच्या चर्चा आहेत.

सुनील शिंदे हे वरळी विधानसभा मतदारसंघातून आमदार होते. परंतु 2019 च्या विधानसभा निवडणुकीत आदित्य ठाकरे यांनी वरळी विधानसभा मतदारसंघातून निवडणूक लढवण्याचं निश्चित केलं.

त्यावेळी विद्यमान आमदार असलेल्या सुनील शिंदेंना आदित्य ठाकरेंसाठी वरळीची जागा सोडावी लागली होती. त्यादरम्यान सचिन अहिर यांनी राष्ट्रवादी काँग्रेसमधून शिवसेनेत प्रवेश केला होता.

आदित्य ठाकरेंच्या बऱ्याचशा कामात सचिन अहिर यांचा सहभाग असल्यामुळे कोणाचं राजकीय पुर्नवसन होणार? याकडे सर्वांचं लक्ष लागलं होतं. पण सुनील शिंदे यांना उमेदवारी दिल्यानंतर निष्ठावंत शिवसैनिकांची पक्षाने किंमत ठेवली अशा प्रतिक्रिया वरळीमधल्या कार्यकर्त्यांनी दिल्या.

मुंबई महापालिकेत 227 जागांपैकी 103 जागा या शिवसेनेच्या आहेत. 83 जागा या भाजपच्या आहेत. एका उमेदवारासाठी साधारण 75-77 मतांचा कोटा असू शकतो.

त्यामुळे कॉंग्रेसकडे तितकी मतं नसल्यामुळे कॉंग्रेसने ही जागा न लढण्याचा निर्णय घेतला आहे. त्यामुळे भाई जगताप यांना काही काळ तरी विधीमंडळातून दूर राहून मुंबई अध्यक्षपद सांभाळावं लागेल.

भाजपकडून राजहंस सिंह यांना उमेदवारी देण्यात आली आहे. राजहंस सिंह हे कॉंग्रेसचे माजी आमदार होते. 2017 मध्ये त्यांनी भाजपमध्ये प्रवेश केला.

मुंबई महापालिका निवडणूकीच्या पार्श्वभूमीवर भाजपने राजहंस सिंह या उत्तर भारतीय चेहर्‍याला संधी दिली असल्याचं बोललं जातंय. मुंबईच्या स्थानिक स्वराज्य संस्थेमधून होणारी ही निवडणूक बिनविरोध होणार आहे.

नागपूरमध्ये कॉंग्रेसने आयात केला भाजप उमेदवार?

नागपूरमध्ये भाजपकडून चंद्रशेखर बावनकुळे यांना उमेदवारी देण्यात आली आहे. चंद्रशेखर बावनकुळे हे फडणवीस सरकारच्या काळात मंत्री होते. पण त्यानंतर 2019ला त्यांना विधानसभेची उमेदवारी नाकारण्यात आली होती. त्यानंतर पहिल्यांदाच बावनकुळे यांना संधी देण्यात आली आहे.

बावनकुळे यांच्याविरुद्ध कॉंग्रेसकडून डॉ. रविंद्र भोयार यांना उमेदवारी देण्यात आली आहे. डॉ. रविंद्र भोयार हे भाजपचे चार वेळा निवडून आलेले नगरसेवक आहेत.

त्यांनी 22 नोव्हेंबरला अचानक कॉंग्रेसमध्ये प्रवेश केला आणि 23 नोव्हेंबरला कॉंग्रेसकडून विधानपरिषदेची उमेदवारी देण्यात आली. त्यामुळे ही लढत चुरशीची होणार आहे. प्रफुल गुडधे यांनी आपला अर्ज मागे घेतला आहे.

धुळे नंदुरबारमध्ये अमरिश पटेल बिनविरोध

धुळे नंदुरबारमध्ये भाजपकडून माजी मंत्री अमरिश पटेल यांना उमेदवारी देण्यात आली आहे. तर महाविकास आघाडीतर्फे गौरव वाणी यांना उमेदवारी देण्यात आली होती. मात्र काँग्रेस चे गौरव वाणी यांनी अर्ज मागे घेतला तसेच शाम सनेर,भुपेश पटेल, आणि दीपक दिघे यांनीही अर्ज मागे घेतले.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)