एकनाथ खडसे: ईडीकडून तब्बल 8 तास चालली खडसेंची चौकशी
फोटो स्रोत, FACEBOOK
माजी महसूल मंत्री एकनाथ खडसे यांची आज ईडीकडून तब्बल आठ तास चौकशी करण्यात आली. पुन्हा जेव्हा चौकशी करायची असेल तेव्हा त्यांना समन्स देऊन बोलवण्यात येणार आहे.
एकनाथ खडसे यांचे वकील मोहन टेकावडे यांनी ही माहिती दिली.
"आम्ही चौकशीसाठी संपूर्णपणे सहकार्य केले. ईडीने मागितलेली कागदपत्रं दिली. आवश्यकतेनुसार एकनाथ खडसे हे चौकशीसाठी हजर राहतील असं आम्ही ईडीला सांगितलं आहे, असं टेकावडे यांनी माध्यमांना सांगितलं.
ही चौकशी राजकीय हेतूने प्रेरित आहे असं एकनाथ खडसे यांनी सकाळी म्हटलं होतं.
"भोसरी भूखंड खरेदीची याआधी पाच वेळा चौकशी झालेली आहे. लाचलुचपत प्रतिबंधक विभागानेही याची चौकशी केली आहे. यातून आतापर्यंत काहीही हाती लागलं नाही. तरीही यात आता ईडीकडून चौकशी केली जात आहे," असं राष्ट्रवादी काँग्रेसचे नेते आणि माजी मंत्री एकनाथ खडसे यांनी म्हटलं आहे.
गुरूवारी (8 जुलै) एकनाथ खडसे हे ईडी कार्यालयात चौकशीसाठी पोहचल्यावर माध्यमांशी बोलताना त्यांनी ही प्रतिक्रिया दिली.
"ही चौकशी राजकीय हेतूने होत आहे. हे सर्वांनाच माहिती आहे. मी भाजप पक्ष सोडून राष्ट्रवादीमध्ये प्रवेश केला. जसा मी पक्ष बदलला तशा माझ्यावर कारवाया सुरू झाल्या. पण मी चौकशीला पूर्णपणे सहकार्य करणार आहे," असंही खडसे यांनी म्हटलं.
भोसरी भूखंड घोटाळ्याप्रकरणी बुधवारी (7 जुलै) एकनाथ खडसे यांना ईडीकडून समन्स बजावण्यात आलं. त्यानंतर आज (8 जुलै) एकनाथ खडसे हे पत्रकार परिषद घेणार होते. परंतु रात्री उशीरा खडसे यांची तब्येत बिघडल्यामुळे पत्रकार परिषद रद्द करत असल्याचं त्यांनी सांगितलं.
त्यांनी दिलेल्या तब्येतीच्या कारणामुळे एकनाथ खडसे हे ईडी कार्यालयात उपस्थित राहणार नाहीत असं बोललं जात होतं. पण ते सकाळी 11 वाजता ईडी कार्यालयात चौकशीसाठी पोहोचले. सध्या त्यांची चौकशी सुरू आहे.
जावई गिरीश चौधरी अटकेत
एकनाथ खडसे यांचे जावई गिरीश चौधरी हे भोसरी भूखंड प्रकरणी ही अटकेत आहेत. त्यांना 12 जुलै पर्यंत पोलीस कोठडी सुनावण्यात आली आहे.
मंगळवारी (6 जुलै) गिरीश चौधरी यांना ईडीने चौकशीसाठी बोलावलं होतं. पण ते चौकशीला सहकार्य करत नसल्याचं ईडीने कोर्टात सांगितलं. बुधवारी (7 जुलैला) गिरीश चौधरी यांना अटक करण्यात आली.
काय आहे भोसरी भूखंड प्रकरण?
2016 मध्ये एकनाथ खडसे राज्याचे महसूल मंत्री होते.
त्यावेळी त्यांच्यावर पुण्यातील भोसरी येथे भूखंड खरेदीत गैरव्यवहार केल्याचा आरोप केला गेला. एकनाथ खडसे यांनी भोसरी येथील सर्वे क्रमांक 52 /2अ /2 मधील तीन एकरचा भूखंड त्यांची पत्नी मंदाकिनी खडसे आणि जावई गिरीश चौधरी यांच्या नावाने खरेदी केला.
हा भूखंड त्यांनी 3 कोटी 75 लाख रुपयांना अकानी नामक या व्यक्तीकडून खरेदी केला होता. पण या भूखंडाचा सातबारा 'एमआयडीसी' च्या नावावर होता. त्यामुळे खडसे यांनी पदाचा गैरवापर करून हा भूखंड खरेदी केल्याचा आरोप झाला.
फोटो स्रोत, Getty Images
पुण्यातील बांधकाम व्यावसायिक हेमंत गावंडे यांनी यासंदर्भात तक्रार केली होती. एप्रिल 2017 मध्ये लाचलुचपत प्रतिबंधक विभागाने एकनाथ खडसे, त्यांची पत्नी मंदाकिनी खडसे, जावई गिरीश चौकशी आणि अकानी यांच्याविरुद्ध गुन्हा दाखल करून चौकशी सुरू केली होती. परंतु 2018 एकनाथ खडसे यांना क्लिन चिट देण्यात आली.
दरम्यान, निवृत्त न्यायाधीशांमार्फत चौकशीसाठी झोटींग कमिटीची स्थापन करण्यात आली. या समितीमार्फतही प्रकरणाची चौकशी झाली. त्यानंतर आता ईडीकडून या प्रकरणाची चौकशी सुरू आहे. याआधीही एकनाथ खडसे यांची ईडीकडून चौकशी करण्यात आली आहे.
हे वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.
बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.
'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)
