राज ठाकरेंना धक्का.. मनसेचे एकमेव आमदार शरद सोनवणे शिवसेनेच्या वाटेवर?

लोकसभा निवडणुकांना अवघा महिना उरला असतानाच मनसेला धक्का बसला आहे. मनसेचे एकमेव आमदार शरद सोनवणे हे पक्षाला रामराम करून शिवसेनेच्या वाटेवर असल्याची चर्चा आहे.

शिवसेनेकडून असा कोणताही प्रस्ताव आला नाही. मात्र शिवसेना पक्षप्रमुखांनी विचारल्यास जुना शिवसैनिक या नात्यानं मी या प्रस्तावाचा विचार करेन, असं म्हणत शरद सोनवणे यांनी शिवसेना प्रवेशाची चर्चा प्रत्यक्षात येऊ शकते याचे संकेत दिले आहेत.

2014 च्या विधानसभा निवडणुकीत शरद सोनवणे हे जुन्नरमधून निवडून आले होते. मनसेचे ते एकमेव विजयी उमेदवार होते. सोनवणे यांना आधी शिवसेनेकडून उमेदवारी जाहीर करण्यात आली होती. मात्र अवघ्या दोन तासांत त्यांचे नाव मागे घेऊन शिवसेना जिल्हा परिषदेच्या गटनेत्या आशा बुचके यांना विधानसभेसाठी तिकीट देण्यात आलं. त्यानंतर सोनवणे यांनी मनसेकडून निवडणूक लढवली आणि ते विजयी झाले.

पाच वर्षांनी पुन्हा एकदा सोनवणे हे शिवसेनेच्या वाटेवर आहेत. मात्र सोनवणे यांच्या नावाला शिवसेनेतूनच तीव्र विरोध होत आहे. आशा बुचके या जुन्नरमधून विधानसभा निवडणूक लढविण्यासाठी उत्सुक आहेत. गेल्या निवडणुकीत सोनवणे यांनी आशा बुचकेंना पराभूत केले होते.

शिवसेनेच्या नेत्या आशा बुचके यांनी मात्र सोनवणे यांच्या 'घरवापसी'ची शक्यता फेटाळून लावली आहे. "शरद सोनवणे यांच्यासाठी आम्ही तालुक्यात ' नो एन्ट्री'चा बोर्ड लावला आहे. जुन्नरमधून मीच उमेदवार असेन. मला सर्वांचा पाठिंबा आहे. मला ही शेवटची संधी द्यायचं ठरलं आहे, अशी प्रतिक्रिया आशा बुचके यांनी बीबीसी मराठीशी बोलताना व्यक्त केली.

जुन्नरमधील राजकीय समीकरणं

अर्थात जुन्नर तालुक्यात शिवसेनेत दोन गट पडले आहेत. त्यामुळं आशा बुचकेंव्यतिरिक्त अन्य इच्छुकांची संख्याही मोठी आहे. खासदार शिवाजी आढळराव पाटील यांनी पक्षश्रेष्ठींचा निर्णय सर्वांवर बंधनकारक असल्याचं म्हटलं आहे.

"हा पक्ष बाळासाहेबांनी आणि शिवसैनिकांनी उभा केला आहे. त्यामुळे पक्षाची भूमिका, बाळासाहेबांची धोरणं सर्वांनी मान्य करायला हवीत," असं मत त्यांनी बीबीसी मराठीशी बोलताना व्यक्त केलं.

"युती होणार की नाही यावर अनेकांनी आपले राजकीय आडाखे बांधून ठेवले होते. शरद सोनवणे यांच्याबाबतही असंच म्हणता येईल. मनसेचा प्रभाव या भागात फारसा नाही. युतीमध्ये जुन्नरची जागा शिवसेनेच्या वाट्याला आली आहे. त्यामुळे शरद सोनवणे हे शिवसेनेला पसंती देतील. ही जागा जर भाजपच्या वाट्याला आली असती तर ते भाजपमध्ये गेले असते. त्यांना केवळ पक्षचिन्हाची गरज आहे. त्यांनी केलेल्या कामांमुळे या भागात त्यांची लोकप्रियता खूप आहे," असं स्थानिक पत्रकार धनंजय कोकणे यांनी बीबीसी मराठीशी बोलताना स्पष्ट केलं.

अमोल कोल्हेंच्या राष्ट्रवादीतील प्रवेशाचा परिणाम

"डॉ अमोल कोल्हे यांनी राष्ट्रवादी काँग्रेसमध्ये प्रवेश केल्यानंतर अमोल कोल्हे यांना शिरूर लोकसभा निवडणुकीच्या रिंगणात उतरवणार की विधानसभेच्या हे निश्चित झालेलं नाही. विधानसभेसाठी कोल्हेंच्या नावाचा विचार होऊ शकतो. जुन्नर तालुक्यात ४० टक्के माळी समाज असल्यानं डॉ. अमोल कोल्हे यांना विधानसभेची उमेदवारी मिळू शकते. मात्र तरीही शरद सोनावणेंचं पारडं जड आहे," असं मत पत्रकार रायचंद शिंदे यांनी बीबीसी मराठीशी बोलताना व्यक्त केलं.

मनसेला आपले नेते जपता येत नाहीत?

मनसेचा एकमेव आमदार शिवसेनेच्या वाटेवर असताना पक्षाला आपले नेते जपता येत नाहीत का, असा प्रश्न उपस्थित होत आहे. मात्र शरद सोनवणे पक्ष सोडून कोठे जाणार नसल्याचं मनसे नेते संदीप देशपांडे यांनी बीबीसी मराठीशी बोलताना सांगितलं.

"पक्षाच्या वरिष्ठ नेत्यांनी शरद सोनवणेंशी चर्चा केली असून आपण पक्ष सोडणार नसल्याचं त्यांनी सांगितलं आहे. त्यामुळे मनसेला आपले नेते जपता येत नाहीत असा आरोप निरर्थक आहे," असं संदीप देशपांडे यांनी म्हटलं.

मनसे सोडणाऱ्या नेत्यांची मोठी यादी

दीड वर्षापूर्वी मनसेच्या मुंबईतल्या सहा नगरसेवकांनी 'मातोश्री'वर शिवसेनेत प्रवेश केला होता. सध्या भाजपचे आमदार असलेले राम कदम हेही एकेकाळी मनसेत होते. मनसेच्या नेतृत्वाचा दृष्टिकोन संकुचित होता. तिथे दाबादाबीचं राजकारण सुरू होतं. त्यामुळे आपण मनसे सोडल्याचं राम कदम यांनी स्पष्ट केलं होतं.

शिवसेनेचे नाशिकमधील खासदार हेमंत गोडसे यांनीही निराश होऊन मनसे आणि राज ठाकरेंची साथ सोडली होती. शिवसेनेचे कन्नडमधील आमदार हर्षवर्धन जाधव, शिवसेना वाहतूक शाखेचे प्रमुख असलेले हाजी अराफत शेख, नाशिकमधले भाजपचे नेते वसंत गीते, औरंगाबाद भाजपचे जिल्हा उपाध्यक्ष डॉ. सुनील शिंदे यांनीही मनसेला सोडचिठ्ठी दिली होती. या नेत्यांनी आपली नाराजी उघडपणे बोलूनही दाखवली होती.

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.)