एकनाथ शिंदे झाले 'शिवसेने'चे मुख्य नेते, सर्वाधिकार शिंदेंकडेच

शिवसेना राष्ट्रीय कार्यकारिणीची बैठक आज संध्याकाळी 7 पासून ते 9.45 पर्यंत कफ परेड येथील ताज रेसिडंट या हाॅटेलमध्ये झाली.

शिवसेना पक्षाचं नाव आणि चिन्ह एकनाथ शिंदे यांना मिळाल्यानंतर ही पक्षाची पहिली राष्ट्रीय कार्यकारिणीची पार पडली.

या कार्यकारिणीच्या बैठकीत एकनाथ शिंदे यांची शिवसेना पक्षाच्या मुख्य नेते पदी निवड करण्यात आली.

सिद्धेश रामदास कदम हे शिवसेनेचे सचिव असतील.

शिवसेना कार्यकारणी बैठकीतील महत्वाचे निर्णय

1) चर्चगेट रेल्वे स्टेशनला माजी केंद्रीय मंत्री चिंतामणराव देशमुख यांचे नाव देणे.

2) राज्यातील भूमीपूत्रांना सर्व प्रकल्पात भूमीपूत्रांना 80% नोकरीमध्ये स्थान देणार.

3) मराठी भाषेला अभिजात भाषेचा दर्जा देणार.

4) स्वातंत्र्यवीर सावकरकरांना “भारतरत्न” देणे. लोकसभा गट नेते खासदार राहुल शेवाळे यांनी सर्वांत प्रथम लोकसभेत ही मागणी केली होती.

5) UPSC आणि MPSC च्या मराठी मुलांना भक्कम पाठिंबा देणे.

6) एमपीएससी, युपीएससी मराठी विद्यार्थ्यांना शासनातर्फे कोचिंग देणार

7. अनुशासन समिती- पक्षाविरोधात काम करणाऱ्यांविरोधात समिती कारवाई करेल

8. दादा भुसे आणि शंभुराज देसाई यांची अनुशासन समितीमध्ये निवड

9. निवडणूक आयोगाच्या नियमांचं तंतोतंत पालन करण्याच्या दृष्टीने ठराव

शिवसेना भवनावर कोणाचा अधिकार?

दादर शिवाजी पार्कजवळ असणारं शिवसेना भवन हे दादर , लालबाग, परळ, वरळी, माहिम या मराठी भागांना जोडणारं आहे. शिवसेनेच्या स्थापनेनंतर जसेजसे कार्यकर्ते वाढत गेले तशी बाळासाहेब ठाकरे यांचं दादरचं घर आणि पर्ल सेंटरच्या ऑफिसची गर्दी वाढू लागली.

त्यामुळे बाळासाहेब ठाकरे यांनी 1974 साली शिवसेना भवनाच्या बांधकामाची सुरवात केली. 19 जून 1977 साली शिवसेनेचं अधिकृत आणि प्रमुख कार्यालय उभं राहीलं. या कार्यालयातील काही खर्च हा वेगवेगळ्या लोकांच्या देणगीतून झाला आहे.

पण शिवसेना भवनची ही जागा शिवसेनेची आहे का? तर नाही. शिवसेना भवनची ही जागा शिवाई ट्रस्टची आहे. कायदेतज्ज्ञ श्रीहरी अणे सांगतात,

"शिवसेना भवनवर जर शिंदे गटाने दावा केला तर शिवाई ट्रस्टने ठरवलं की ही जागा आम्हाला ठाकरे गटाकडे ठेवायची आहे तर ती जागा ठाकरेंकडेच राहणार. जर ती जागा शिवसेना पक्षाच्या नावावर असती तर शिंदे गटाला मिळू शकली असती."

शिवाई ट्रस्टच्या ट्रस्टींमध्ये सुभाष देसाई, उद्धव ठाकरे, विशाखा राऊत, दिवाकर रावते, लीलाधर डाके हे नेते आहेत. त्यामुळे ही जागा ठाकरेंकडे राहील.

शिवसेनेचे आमदार संजय शिरसाट याबाबत बोलताना म्हणतात, "शिवसेना भवन ही आमच्यासाठी मालमत्ता नाही तर ते आमच्यासाठी मंदिर आहे. आम्ही त्यावर कधीही दावा सांगणार नाही. याउलट आजही तिथे वाकून नमस्कार करू."

शाखा कुणाच्या?

शिवसेनेतील पदाची रचना पाहीली तर शाखाप्रमुख, उपविभागप्रमुख, विभागप्रमुख, जिल्हाप्रमुख, विभागिय नेते, उपनेते, नेते, पक्षप्रमुख आणि शिवसेनाप्रमुख हे पदं आहेत. शिवसेनेची शाखा आणि शाखाप्रमुख या पदाला शिवसेना पक्षात विशेष महत्त्व आहे.

शिवसेनेला तळागाळातील लोकांमध्ये पोहोचवण्यासाठी, लोकांच्या मदतीसाठी या शाखांचा मोठा वाटा आहे. अनेक मोठ्या नेत्यांपैकी रामदास कदम, नारायण राणे, दिवाकर रावते यासारख्या अनेक नेत्यांच्या राजकारणाची सुरूवात शाखाप्रमुख या पदापासून झाली आहे.

मुंबईत शिवसेनेच्या 227 शाखा आहेत. तर MMR रिजनमध्ये ठाण्यासह 500 शाखा आहेत. एकनाथ शिंदे आणि उध्दव ठाकरे यांच्यासोबत अनेक कार्यकर्ते दोन गटात विभागले गेले आहेत.

दादरची शिवसेना शाखा शिवाई ट्रस्टच्या अंतर्गत आहे. जी अधिकृतपणे पक्षाकडून चालवली जाते. पण इतर शाखा या भाडेतत्वावर किंवा कुणाच्या तरी मालकीच्या आहेत. त्या शाखेतील जे शाखाप्रमुख आणि कार्यकर्ते एकनाथ शिंदेंच्या गटात सामिल झाले आहेत त्या शाखा त्या त्या गटाकडे जाऊ शकतात.

"शिवसेना भवनासह राज्यातील आमच्या शाखा कुठेही जाणार नाहीत. आमचे शिवसैनिक तिथेच बसून काम करतील. उध्दव ठाकरे हेच आमचे सेनापती असतील," असं संजय राऊत म्हणालेत.

शिवसेनेचे खासदार राहुल शेवाळे म्हणतात, "आमच्या पक्षाकडून सहा महिन्यांनंतर सर्व ठिकाणी शाखा उघडल्या जातील. प्रत्येक आमदाराच्या मतदारसंघात या शाखा उघडल्या जातील."

पक्षाचा निधी, युनियन कोणाच्या असतील?

विविध कंपन्यांमधील संघटना या खासगी आहेत. मुंबईतील विविध पंचतारांकीत हॉटेल, विमानतळ, टेलीफोन एक्सचेंज अशा असंख्य ठिकाणी शिवसेनेच्या युनियन आहेत. या सर्व युनियन खासगी असून त्यावर पक्षाचा एक माणूस प्रमुख म्हणून काम करत असतो. तिथे काम करणारे कर्मचारी पक्षाच्या त्या व्यक्तीसोबत काम करत असतात.

त्यामुळे खासगी युनियनवर दावा न सांगता शिंदे गटाला नव्याने या संघटनांची स्थापना करावी लागेल.

कायदेतज्ञ श्रीहरी अणे सांगतात, "शिवसेना नावाचं जर कोणतं बॅंकेत खातं असेल. त्यात पार्टी फंड जमा असेल तर त्यावर एकनाथ शिंदे दावा करू शकतात. पण जर ती खाती वेगळ्या कंपनीच्या किंवा ट्रस्टच्या नावे असेल तर तो निधी कोणाचा यावर कायदेशीर वाद चालू शकतो."

रिक्षावाला ते महाराष्ट्राचे मुख्यमंत्री

राजकारणात येण्यापूर्वी एकनाथ शिंदे रिक्षा चालवायचे. पण वयाच्या अवघ्या 18 व्या वर्षी त्यांनी राजकारणात कार्यकर्ता म्हणून प्रवेश केला आणि 30-35 वर्षांनंतर आता ते मुख्यमंत्रिपदापर्यंत पोहचले आहेत. तसंच एकनाथ शिंदे हे ठाणे जिल्ह्याचे पालकमंत्री देखील आहेत.

ठाण्यातील शिवसेनेचे नेते दिवंगत आनंद दिघे यांच्या मार्गदर्शनाखाली शिंदे यांना राजकारणाची दिशा मिळाली. 1997 मध्ये आनंद दिघेंनी शिंदेंना ठाणे महापालिकेचं तिकीट दिलं.

एकनाथ शिंदे हे गेली अनेक दशके ते शिवसेनेत संघटन वाढवणारे महत्त्वाचे नेते आहेत. त्यांचे पुत्र श्रीकांत शिंदे कल्याण मतदारसंघातून दुसऱ्यांदा लोकसभेत गेले आहेत.

आपल्या पहिल्याच प्रयत्नांत शिंदेंनी महापालिकेत बाजी मारली आणि ठाणे महापालिकेचे सभागृह नेतेही झाले. 2004 साली त्यांनी विधानसभेची निवडणूक लढवली. इथे सुद्धा पहिल्याच प्रयत्नात ते निवडून आले.

2004 सालापासून सलग चार वेळा कोपरी पाचपाखाडी मतदारसंघातून आमदारपदी निवडून आलेत.

शिंदे यांनी या आधी 2015 ते 2019 पर्यंत सार्वजनिक बांधकाम या खात्याचे मंत्री म्हणून काम पाहिले. तसंच तत्कालीन मुख्यमंत्री देवेंद्र फडणवीस यांनी त्यांच्यावर मुंबई-नागपूर समृद्धी महामार्गाची जबाबदारी सोपवली होती.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहि61890597ले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)