Ристе Панов ни пренесува како жителите од општината Делчево думаат (зборуваат) за својот дијалект.

-„М'жо е диреко на каштата, а жената е пајантата. Жената шо може да дигне маж не може да дигне, това си e подаданија на м'жо."

СЛУШНЕТЕ ГО ПРИЛОГОТ

Овие творби се собирани од Димитар Узунски кој над 40 години ги собира во регионот на Пијанец. Toj укажува дека овој дијалект има своја предност:

-„Можат да се направат многу убави творби. Богат е нашиот фолклор и со народни поговорки, приказни, песни што се карактеристични само за нашиот крај."

Пијанечкиот дијалект попримил влијание и затоа има два дела на говорот, додава Узунски:

-„Еден дел од говорот се населбите од Делчево кон Берово, а другиот дел од Делчево кон Македонска Каменица до Кочани."

Во делчевскиот говор глаголот во минато време има друга форма, вели професорот Атанас Николовски:

-„Тие расправаа и кажуваа спомени како било некогаш, а во Делчево би рекле тие расправаше и кажуваше како било некогаш. Тоа е во глаголите."

Зенел Реџепов од Делчево укажува дека најкарактеристична е честата употреба на зборот „еле“ што значи „нели“:

-„Чим ќе чуеш ’еле’ знај дека е од Делчево, или чим ќе чуеш ’ќе’ това е исто од Делчево. А коа ќе чуеш ’че’ това веќе е малешевијата. Че одиш, ќе одиш."

Постојат и други специфични зборови:

-„За надвор се вика вонка, за куќа кашча, за свеќи се вика свешча. За шпоре кај нас е кофтор, за врапче џингар."

Различни се искуствата кога се контактира со луѓе од другите краеви на Македонија:

-„Во Скопје ќе ода во една аптека, флазам и думам си на делчевски и кажувам, дај ми това и това а она вика: извинете не ве разбирам."

-„ Учех средна школа во Кочани. Професоро по македонски ме пита ајде да кажеш дијалектна реченица од вашио крај. И му кажувам ’у зора убулантата при докторо по апове’. И он така ме гледа чудно. Това значи утре сабајле рано во амбулантата кај докторот по апчиња."

За да бидеме разбрани надвор, сепак си зборуваме литературно, вели делчевчанката Тереза:

-„Со мои луѓе од Делчево си думам делчевски, а надвор од Делчево зборувам литературно македонски."