Ihe asaa a gaghị echefu banyere ngagharịiwe ndị ntoroọbịa mere na mba Nepal
Ebe foto si, Sunil Pradhan/Anadolu via Getty Images
- Onye dere ya, Michael Ilediagu
- Ndị mere akụkọ a, Journalist
- Ebeg o si, Lagos
- Oge e ji agụ akụkọ nkeji 3
Kemgbe ndị ntoroọbịa mere ngagharịiwe na mba Nepal ma chụpụ ndị n'ọchịchị, ọtụtụ na-ajụ ajụjụ banyere ihe mba dị iche iche nwereike ịmụta n'ihe mere na Nepal.
Ndị ntoroọbịa ahụ kpọrọ onwe ha 'Gen-Z' ji iwe mmachi gọọmenti machiri soshal midịa bido ngagharịiwe nke mechaara banye n'ọgbaaghara.
Ọgbaghara a mere ka ọchịchị mba ahụ gbanwee site n'ịgba arụkwaghịm n'ọrụ nke Praịm minista ha bụ KP Sharma Oli gbara.
Ndị 'Gen-Z' ahụ wakporo obi gọọmenti, gbaa ụlọomeiwu ọkụ, wakpoo ọtụtụ ndị omeiwu nakwa ndị ọrụ gọọmenti a ma ama ma gbaa ụlọ ha ọkụ.
Gịnị butere ngagharịiwe na ọgbaaghara ahụ?
Ebe foto si, AFP via Getty Images
Ọtụtụ ihe dịka oke agụụ, enweghị ọrụ, ọnụahịa na-arị elu, tinyere mpụ na nrụrụaka ndị ọchịchị na-eme so n'ihe bụ iwe ndị ntoroọbịa ahụ kpọrọ onwe ha Gen-Z.
Ndị Gen-Z a ji soshal midịa na-akatọ ajọ ndụ ndị ọchịchị a ma na-agba ezinaụlọ ha n'anwụ.
Ndị Gen-Z a pụtara n'igwe were malite ngagharịiwe mgbe gọọmenti machiri soshal midia, gụnyere Facebook, Twitter, Instagram na ndị ọzọ.
Ọgbaaghara na mwakpo obi gọọmenti malitere mgbe ndị uweojii gburu mmadụ iri na itoolu nke mere ha jiri malite ịgba ụlọọrụ gọọmenti ọkụ.
Ọgbaaghara ahụ gara n'ihu na-agbanyeghi na gọọmenti mba Nepal mechara wepụ mmachi ha machiri soshal midịa.
Gọọmenti machiri soshal midịa mgbe e bidoro na-egosi udịrị ndụ mmefu ego ndị nọ na gọọmenti nakwa ezinaụlọ ha na-ebi na soshal na-agbanyeghị na oke agụụ na-anyụ ụmụafọ Nepal ịkpakwụ.
Etu ọnọdụ si dị na mba Nepal ugbua
Ugbua, Nepal enweela gọọmenti na Praịm minista ọhụrụ nke ndị Gen-Z ahụ kwadoro, nke so n'ọnọdụ ha nyere maka udo na ịkwụsị ọgbaaghara ahụ.
Praịm minista ọhụrụ a bụ Sushila Karki bụ nwaanyị mbụ ga-anọ n'ọkwa ahụ. Ọ dị afọ iri asaa na abụọ ma kwuo na ya ga-enyefe ọchịchị n'aka gọọmenti ọhụrụ n'ọnwa isii na-abịa ka ha na-atụanya ime ntuliaka na Maachị 5, 2026.
E duru Sushila n'iyi ọrụ n'isi obodo ha bụ Kathmandu n'abalị iri na anọ nke ọnwa Septemba afọ 2025.
O kwuru na ya ga-eme ihe niile ndị Gen-Z chọrọ dịka o bidoro ọrụ dịka Praịm minista nchere oge nke mba Nepal.
Ebe foto si, PRABIN RANABHAT/AFP via Getty Images
Ihe ndị uweojii mere
E boro ndị uweojii ebubo ịgbagbu ndị na-eme ngagharịiwe ahụ bụ nke a sị butere nnukwu ọgbaaghara na ịgba ụlọọrụ gọọmenti nakwa ụlọ ndị nọ n'ọchịchị ọkụ.
Mana ọsịsa ndị uweojii Nepal nyere banyere ebubo ahụ bụ na odoghị anya onye nyere iwu ka ndị uweojii gbagbuo ndị na-eme ngagharịiwe ka ha mechere nnyocha nke ha.
Ọnụ ọgụgụ ndị nwụrụ anwụ n'ọgbaaghara ahụ ruru iri asaa dịka ndị uweojii mba ahụ si kwuo.
Ihe asaa a gaghị echefu
- Ndị ntoroọbia na-eme ngagharịiwe ji naanị abalị abụọ gbanwe gọọmenti dịka Praịm mịnịsta ha bụ KP Sharma Oli gbara arụkwagịm.
- N'abalị nke abụọ mgbe ọgbaaghara dapụtara ka ndị ntoroọbia ahụ gbara ụlọ Praịm minista Sharma na nwunye ya ọkụ.
- Ihe butere ngagharịiwe bụ maka na gọọmenti machiri soshal midịa
- Mana ngagharịiwe ahụ banyere n'ọgbaaghara mgbe ndị uweojii gburu ndị ntoroọbịa ruru iri na isii n'ụbọchị nke mbụ.
- N'oge ọgbaaghara ahụ ka a gbara ụlọomeiwu ọkụ, wakpoo ndị nọ na gọọmenti, tie ọtụtụ n'ime ha ihe, gbaa ụlọ ha nakwa ụgbọala ha ọkụ, wakpoo ndị uweojii ma gbaa ụlọọrụ ha ọkụ dgz.
- Mba Nepal họpụtara Prịam mịnịsta nchere oge ọhụrụ aha ya bụ Sushila Karki onye kwere nkwa na ya ga-eme ihe ndị Gen-Z kwuru ma nyefe ọchịchị n'aka gọọmenti ọhụrụ n'ọnwa isii.
- A ga-eme ntuliaka ga-ewepụta gọọmentị na ndị ọchịchị ọhụrụ na Maachị 5, 2026.
